Densaýlyq saqtaý mınıstri úkimettik emes uıymdarmen birlesken jumystardyń jaıyn talqyǵa saldy

ASTANA. 15 aqpan. QazAqparat - «Búgin Densaýlyq saqtaý mınıstri Salıdat Qaıyrbekova selektorlyq tártipte respýblıkanyń 140-tan astam úkimettik emes uıymdary ókilderiniń qatysýymen

QR Densaýlyq saqtaý mınıstrligi janyndaǵy Patsıentterdiń quqyqtarynqorǵaý jónindegi qoǵamdyq keńestiń kezekti otyrysyn ótkizdi», - dedi dep habarlaıdy vedomstvonyń baspasóz qyzmeti.

Keńes otyrysynda densaýlyq saqtaý salasynyń ózekti máseleleri, azamattardyń óz densaýlyqtary úshin ortaq jaýapkershiligin arttyrý, «Salamatty Qazaqstan» memlekettik baǵdarlamasyn iske asyrýda úkimettik emes uıymdardyń qyzmetin belsendi etý jaıy talqylandy.

Jıynda mınıstr óńirlik densaýlyq saqtaý basqarmalarynan naýqastardyń jekelegen sanattary úshin dárilik preparattardy naqty josparlaýdy talap etti.  «Dárilik quraldardy josparlaý úrdisi eń aldymen, naýqastar úshin barynsha ashyq jáne túsinikti bolýy tıis», - dedi mınıstr.      

Úkimettik emes uıymdar ókilderi mınıstrge 2011 jyly atqarylǵan áleýmettik tapsyrys nátıjeleri týraly baıandady. Sonymen qatar, óńirlerde áleýmettik tapsyrysty damytýdyń negizgi baǵyttary anyqtaldy.  Densaýlyq saqtaý mınıstrligi men úkimettik emes uıymdar arasynda qoǵamdyq densaýlyq saqtaý máselelerin birlesip sheshýde birshama tájirıbe bar. Atap aıtqanda, dárigerler men provızorlar, farmatsevtıkalyq qyzmetti, farmatsevtıkalyq jáne medıtsınalyq ónimderdi qoldaý jáne damytý salasyndaǵy kásibı qaýymdastyqtar, táýelsiz sarapshylar salaǵa qatysty normatıvtik quqyqtyq baza ázirleýge jáne onyń aıasyn keńeıtýge, konsýltatıvtik organdar jumysyna belsendi qatysady.

Úkimettik emes uıymdar Densaýlyq saqtaý mınıstrliginiń baǵdarlamalaryn iske asyrýǵa da aralasady. Birlese atqarylǵan is-sharalar nátıjesinde elimizde ana ólim-jitimi - 1,5 esege, bala ólim-jitimi - 9,9 paıyzǵa, qan aınalymy júıesi aýrýlarynan bolatyn ólim-jitim - 20 paıyzǵa, qaterli isik aýrýlarynan bolatyn ólim-jitim - 8,3 paıyzǵa, týberkýlezben syrqattanýshylyq - 9 paıyzǵa, ólim-jitim kórsetkishi - 23 paıyzǵa azaıdy.

Qan dıabetine shaldyqqandarǵa medıtsınalyq kómek kórsetý, aýrýdyń jáne asqynýlardyń aldyn alý, sonymen qatar qant dıabeti problemalary týraly halyqty aqparatpen qamtamasyz etýde Qazaqstan Respýblıkasynyń Dıabet qaýymdastyǵymen tyǵyz qarym-qatynas jolǵa qoıyldy. Táýelsiz sarapshylar qaýymdastyǵy jáne Qazaqstan Respýblıkasynyń medıtsınalyq qyzmetkerler kásipodaǵymen ózara birlesken is-sharalar júzege asyrylýda.