Densaýlyq saqtaý mınıstri pandemııa kezindegi ana ólimine qatysty túsinikteme berdi
Mınıstr Memleket Basshysy Qasym-Jomart Toqaevtyń tóraǵalyǵymen Qazaqstanda koronavırýs ınfektsııasynyń taralýyna jol bermeý máseleleri jóninde keńeste eldegi sanıtarlyq-epıdemıologııalyq jaǵdaı men qabyldanyp jatqan sharalar týraly baıandady.
Densaýlyq saqtaý mınıstri Prezıdentti ana ólimine qatysty máseleler jaıly da habardar etti jáne bul problemanyń erekshe baqylaýda ekenin atap ótti. Epıdjaǵdaıǵa qaramastan, elimizde demografııalyq kórsetkishterdiń oń serpini baıqalady: bala týý 4,5% ósken nemese týǵan náreste sany 20 myńǵa artqan.
Pandemııa kezeńinde elimizde COVID-19 jáne pnevmonııa juqtyrǵan 9 myńnan astam júkti áıel tirkeldi, bul barlyq tirkelgen jaǵdaılardyń 7,5%.
«Osy jyldyń 3-toqsanynda COVID-19 koronavırýs ınfektsııasyn juqtyrǵandar kúrt ósýine baılanysty ana ólimi artty. Búginde jaǵdaı turaqty. Sońǵy eki aıda Covid-19 koronavırýs ınfektsııasynan júkti áıel qaıtys bolǵan joq», - dedi A. Tsoı.
Júkti áıelderge medıtsınalyq kómek kórsetý sapasyn jaqsartý úshin mınıstrlik aýyr jáne qıyn jaǵdaıdaǵy júkti áıelderge kúndelikti monıtorıng júrgizetin «Ahýaldyq akýsherlik ortalyq» uıymdastyrdy. Sondaı-aq, «Júkti áıelderdegi COVID-19» dıagnostıkalaý men emdeýdiń klınıkalyq hattamasy jáne «COVID-19 pandemııasy kezinde júkti áıelder men balalarǵa medıtsınalyq kómek kórsetý tártibi týraly» ádistemelik usynymdar ázirlenip, densaýlyq saqtaý basqarmalaryna jiberilgen.