Densaýlyq saqtaý mınıstri Qostanaı oblysynyń densaýlyq saqtaý nysandarynyń jumysymen tanyspaq
ASTANA. 4 naýryz. QazAqparat - QR Premer-Mınıstri Kárim Másimovtiń tapsyrmasymen Densaýlyq saqtaý mınıstri Salıdat Qaıyrbekova Qostanaı oblysynda ekinkúndik jumys saparymen júr,
dep habarlady pm.kz saıty.
Mınıstr is-saparynyń basty maqsaty - Elbasy Nursultan Nazarbaevtyń aǵymdaǵy jylǵy Qazaqstan halqyna arnalǵan «Áleýmettik-ekonomıkalyq jańǵyrtý - Qazaqstan damýynyń basty baǵytty» atty Joldaýynda júktelgen mindetterdiń júzege asyrylýyn, sonymen qatar aǵymdaǵy jyldyń 27 qańtarynda ótken Úkimettiń keńeıtilgen otyrysyndaǵy synı eskertpelerdi eskere otyryp, halyqqa kórsetiletin medıtsınalyq qyzmetterdiń sapasyn baǵalaý.
Búgin S.Qaıyrbekova Qostanaı oblysy Meńdiqara aýdanynyń birqatar densaýlyq saqtaý nysanynda bolady dep kútilýde. Al erteń ol oblystyq aýrýhanada, perzenthanada bolyp, oblystyq medıtsına salasynyń qyzmetkerlerimen kezdesedi.
