Densaýlyq saqtaý mınıstri: Koronavırýs órshigen elderden jolaýshy tasymaldaýdy azaıtý kerek
«Basqa memleketter boıynsha búgin vedomstvoaralyq shtab otyrysy bolady. Bizdiń usynysymyz Ońtústik Koreıa, Italııa, Iran jáne Japonııa memleketterimen qarym-qatynasty tómendetip, ushaqtar men jolaýshy tasymalyn azaıtý kerek. Onyń sebebi osy memleketterde keıingi úsh kúnde koronavırýs ınfektsııasymen aýyrǵandar sany kóbeıip kele jatyr. Bizdiń azamattarǵa taǵy da eskerte ketsem, ásirese Koreıaǵa barýshylarǵa – qazir onda barýǵa bolmaıdy. Óte qaýipti», - dedi Eljan Birtanov Úkimet otyrysynan keıin tilshilerge.
Onyń aıtýynsha Ońtústik Koreıada zańsyz jumys istep jatqan otandastarymyzdyń máselesi de vedomstvoaralyq komıssııada qaralmaq.
«Muny biz bilemiz. Bizdiń azamattarymyz kóp. Emdelýge barǵandar, týrıs bolyp barǵandar, jumys istep jatqandar da bar. Olardyń elge qaıtýyna múmkindik berýimiz qajet. Biraq barlyq azamattar tolyq tekseriletin bolady», - dedi ol.
Eljan Birtanov halyqtyń karantındik sharalardy durys túsinbeýi alańdatatynyn aıtty.
«Mundaı oqıǵaǵa kóptegen elder tap bolyp jatyr. Azamattarǵa taǵy bir ret júgingim keledi. Karantınge jatqyzylǵan adamdar naýqas bolyp sanalmaıdy. Bul qaýipsizdik sharasy. Biz 20 aqpannan beri syrttan kelgen azamattarǵa ózdiginen oqshaýlanýǵa keńes berip otyrmyz. Dostardan, áriptesterden oqshaýlaný qajet. Bul búkil álemde qoldanylyp otyrǵan tájirıbe. Kóptegen elder arnaıy karantındik oryndarmen qatar úıde oqshaýlaný sharalaryn da usynyp jatyr. Óıtkeni barlyǵyn arnaıy orynǵa ornalastyrý múmkin emes. Baıbalam týǵyzdyń qajeti joq ekenin aıtqym keledi. Qajetti sharanyń bári jasalyp jatyr. Bul aýrýdy emdeý múmkindigi bizde bar. Deı turǵanmen aýrý baılanys arqyly tez juǵady», - dedi ol.