Densaýlyq saqtaý mınıstri Qazaqstandaǵy oqýshylardyń negizgi aýrýlaryn tizip berdi
«Profılaktıkanyń taǵy bir mańyzdy baǵyty - ol mektep oqýshylaryn saýyqtyrý. Atap aıtqanda, oqýshylardy profılaktıkalyq tekserý kezinde alǵash ret anyqtalǵan aýrýlardyń qurylymynda birinshi orynda ishek-qaryn joly aýrýlary tur, ıaǵnı búginde onyń deńgeıi 25 paıyzdan asyp otyr. Ekinshi orynda kóz aýrýlary - 16,2 paıyz, al úshin orynda tynys alý jáne ót, baýyr aýrýlary baıqalýda», - dedi mınıstr.
Sonymen qatar ol «Densaýlyq» memlekettik baǵdarlamasynyń aıasynda mekteptegi medıtsınany bilim berý júıesinen densaýlyq saqtaý júıesine berý qarastyrylyp otyrǵandyǵyn jetkizdi. Oqýshylarǵa arnalǵan saýyqtyrý sharalarynyń kúntizbesin jasaý josparlanyp otyr. Onda jyl boıynda balalardy saýyqtyrý sharalarymen qamtý qarastyrylǵan.
Atap aıtqanda, onda balalardy profılaktıkalyq tekserý sharalaryn mamandardyń shyǵý brıgadalaryn shaqyrý arqyly bilim berý ordalarynda ótkizýdi, oqý merzimi men demalys kezinde saýyqtyrý sharalaryn uıymdastyrýdy, balalardyń dene bitiminiń durys qalyptasýyna tıisti sharalardy qamtý, qosymsha dárýmendeý, fızıoterapııalyq sharalar, sondaı-aq basqa da densaýlyq saqtaý tehnologııalaryn engizý qarastyrylǵan.