Densaýlyq saqtaý mınıstri dárihanalardaǵy ústeme baǵalar týraly aıtty
«Almaty jáne Astana qalalaryndaǵy bólshek saýdada, dárihanalarda baǵalardy anyqtaý barysynda bir dáriniń qunyndaǵy aıyrmashylyǵy qala ishinde 100 paıyzdan astam bolýy múmkin ekenin baıqaldy. Mysaly, «Ketorol» preparatynyń eń tómengi baǵasy 230 teńge bolsa, al eń joǵary baǵa 500 teńgege deıin jetti», - dep naqtylady Birtanov.
Onyń aıtýynsha, ústeme baǵa búgingi tańda kóterme býynda dárilik zattardyń qunyna qaraı 7-den 50 paıyzǵa deıin, al bólshek saýda segmentinde 30 paıyzdan bastap keıbir preparattarǵa 300 paıyzǵa deıin artady.
«Bundaı jaǵdaıǵa maýsymdyq qajettilik pen joǵary suranystyń bolýy áser etedi. Búginde elimizde tek tegin beriletin dárilik zattar men medıtsınalyq buıymdardyń quny shekti joǵary baǵanyń belgilenýmen retteledi. Endi barlyq dárilik zattardyń shekti qunyn belgileý arqyly halyqqa dári-dármek qoljetimdiligi máselesin sheshý kózdelgen. Kóterme jáne bólshek saýdadaǵy shekti baǵalar Densaýlyq saqtaý mınıstrliginiń buıryǵymen bekitiledi», - dedi mınıstr.
Onyń sózine qaraǵanda, dárilik zattardyń baǵalary týraly aqparat alýǵa múmkindik beretin mobıldik qosymsha ázirlenip jatyr.
Atap aıtqanda, búgingi jalpy otyrys barysynda «Qazaqstan Respýblıkasynyń keıbir zańnamalyq aktilerine dárilik zattar men medıtsınalyq buıymdardyń aınalysy máseleleri boıynsha ózgerister men tolyqtyrýlar engizý týraly» zań jobasy qaraldy. Talqylaýdan keıin Májilis depýtattary zań jobasyn birinshi oqylymda maquldady.