Densaýlyq saqtaý mınıstri dáriger jetispeýshiligine qatysty pikir bildirdi

ASTANA. QazAqparat - Qazaqstanda medıtsınalyq joǵary oqý oryndaryn bitiretin túlekterdiń sany alǵashqy medıtsınalyq-sanıtarlyq kómek dárigerlerine degen suranys kóleminen artady. Degenmen, óńirlerde mamandar jetispeıdi, dep habarlaıdy QazAqparat tilshisi QR Densaýlyq saqtaý mınıstri Eljan Birtanovqa silteme jasap.

QR Parlamenti Májilisiniń depýtaty Turǵyn Syzdyqovtyń aıtýynsha, óńirlerde 40% deıin dárigerler jetispeıdi, al 60% 4-5 jyldan keıin zeınetke shyǵady.

Kadr jetispeýshiligi máselesin Densaýlyq saqtaý mınıstri de rastady. Ol alǵashqy medıtsınalyq-sanıtarlyq kómek júıesin mysalǵa keltirdi. Osyǵan baılanysty, medıtsınalyq ýchaskelerdiń sanyn 1,5 myńǵa deıin arttyrý josparlanǵan. Ol úshin 1,5 myń dáriger men 4,5 myń medbıke qajet bolady.

«Túlekterimiz jetip artylady. Tipti oqýǵa qabyldaýdy azaıta bastadyq, bizdiń elde jan basyna shaqqandaǵy kadrlarmen qamtý deńgeıi damyǵan elderden asyp túsedi. Alaıda, dárigerler barýy kerek jerlerge barmaı, tipti mamandyqpen jumys jasamaıtyn kezderi bolady», - dedi mınıstr.

Sol sebepti 2019 jyldan bastap Qazaqstandaǵy túlekter óńirlerde 3 jyl jumys isteýge mindetteledi. Eljan Birtanov atalmysh mehanızmdi engizý arqyly sektordaǵy kadr jetispeýshiligin azaıtýǵa bolady degen pikirde.

Mınıstrdiń aıtýynsha, kadr jetispeýshiligine tek el ishindegi kóship-qoný ǵana emes, sondaı-aq, shet elge ketý sebep bolýy múmkin. Qazaqstandaǵy negizgi másele - eńbekaqynyń azdyǵy. Atalmysh problemany sheshý úshin kelesi jyldan bastap alǵashqy medıtsınalyq-sanıtarlyq kómek qyzmetkerleriniń jalaqysyn 20% kóterý josparlanǵan. Degenmen, bul barlyq qyzmetkerge qatysty bolmaıdy, tek naýqastardy baqylaýdyń jańa ádisterine (balalardy  úıde baqylaý, júkti áıelderdi tekserý) kóship, jaqsy jumys jasaǵan dárigerlerge ǵana jaǵdaı jasalady.