Densaýlyq saqtaý mınıstri COVID-19-ben kúreske atsalysqan volonterlerdi marapattady
Volonterler jylynyń jabylýyna arnalǵan onlaın marapattaý rásimine COVID-19 pandemııasy kezinde dárigerler men medıtsınalyq qyzmetkerlerge kómektesken eriktiler qozǵalysynyń ókilderi, kásipkerler men medıtsınalyq stýdentter qatysty.
«Sizder óte qıyn kezde janashyrlyq pen qamqorlyq tanytyp, kómekke muqtaj jandarǵa qol ushyn sozdyńyzdar. Men árbirińizdi maqtan tutamyn, ıgi is atqaryp, jaqsy bastama kótergen ár qazaqstandyqpen maqtanamyz. Sizder arnaıy ýaqyt bólip, dári-dármek pen tamaq tarattyńyzdar, aýrýhanaǵa kómektesip, naýqastarǵa úmit syıladyńyzdar», - dedi mınıstr.
Densaýlyq saqtaý mınıstri COVID-19 qarsy kúreske qatysyp, dárigerlerge kómektesip, túski as uıymdastyrǵan, muqtaj adamdarǵa azyq-túlikpen qamtamasyz etkenderdiń barlyǵyna alǵysyn bildirdi. Mınıstrdiń pikirinshe, bul shynaıy patrıotızmniń úlgisi.
«Búgin biz Qazaqstandaǵy volonterler qozǵalysynyń az ǵana bóligine alǵys hat tabystaımyz. Eger múmkindik bolsa, men ár eriktiniń qolyn alyp, alǵys aıtar edim. Árqaısyńyzǵa raqmet», - dedi vedomstvo basshysy.
Qoǵam qaıratkeri, «DA-VINCI» túzetý ortalyǵynyń jetekshisi jáne volonter Merýert Baızırova mınıstrge qoldaýy úshin alǵysyn bildirdi. Karantın kezinde ol jetekshilik etken eriktiler toby elordalyq ınfetsııalyq aýrýhananyń medıtsınalyq qyzmetkerlerine tegin tamaq uıymdastyrdy, qymbat dári-dármek satyp aldy, dári-dármek pen JQQ tasymaldaýdy uıymdastyrdy, medıtsına qyzmetkerleri transportpen qamtamasyz etti.
«250 adam birigip, otbasylarǵa kómektesý úshin qarajat jınaı bastady. Bizdiń top aı saıyn 300 myń teńgeden jınap, aıyna bir naýqas balaǵa kómektesti. Sondaı-aq, biz koronavırýstan zardap shekken dárigerlerdi nazardan tys qaldyrmadyq», - dedi Merýert Baızırova.
Volonterler jylyna oraı jáne pandemııaǵa qarsy kúreske qosqan úlesi úshin 100 astam eriktige Densaýlyq saqtaý mınıstriniń alǵys haty tabystaldy.
Olardyń ishinde - Medsupportkz negizin qalaýshy Aqmaral Tursynova, ol aqparattyq qoldaý uıymdastyrdy, Qazaqstan, Eýropa elderi, AQSh jáne Japonııadan kelgen 100 ǵalym men dárigerdiń basyn qosty. Medsupportkz portaly COVID-19 boıynsha ǵylymı jumystardy orys jáne qazaq tilderine aýdardy, halyqtyń COVID-19-ǵa qatysty túrli suraqtaryna jaýap berdi.
«Medıtsına qyzmetkerlerine túski as» jobasynyń negizin qalaýshy Aısulý Tustyqbaeva – onyń komandasy qaıyrymdylyq kontsertter arqyly qarajat jınady, al jınalǵan aqshaǵa kafe men meıramhanalardan túski asqa tapsyrys berip, COVID-19-ǵa qarsy kúreske tikeleı tartylǵan aýrýhanalarǵa tamaq jetkizdi.
«Teaching For Heroes» negizin qalaýshy Ilıa Kan onlaın platformada dárigerlerdiń balalaryn oqytýǵa arnalǵan aǵylshyn tili sabaqtaryn uıymdastyrdy.
«Túski astyń» negizin qalaýshy Rasıma Temirbaeva - onyń komandasy qarajat jınady jáne ol aqshaǵa zeınetkerlerdi túski aspen qamtamasyz etti, muqtaj adamdarǵa azyq-túlik satyp aldy.
«Shuǵyla» qoǵamdyq qorynyń negizin qalaýshy Meıirhan Ábdirahmanov – eriktiler 4 myń ottegi kontsentratoryn satyp alý úshin qarajat jınady. Kásipkerler, janashyr azamattar memlekettik organdardyń qoldaýymen 450 mıllıon teńge jınady.
«Aqjurek2020» jobasynyń negizin qalaýshy Ajar Jandosovanyń komandasy Covid-19-ǵa qarsy kúreske tartylǵan dárigerlerge JQQ, maska men qolǵap satyp alýǵa jáne jetkizýge qarajat jınady.
«GREEN AUTOSERVICE» bas dırektory Erlan Nurpeıisov – pandemııa kezinde eki jeke klınıkanyń jumysyn uıymdastyrdy, eriktilerdiń qyzmetin úılestirdi, júkterdi shoǵyrlandyryp, dárilik zattar men preparattardy taratty, tasymaldady.
«OAD-27» JShS dırektory Elena Kýznetsova – eki klınıkaǵa 20 mln astam teńgege jedel dári-dármek jiberdi.
Qaraǵandy medıtsınalyq joǵary oqý ornynyń besinshi kýrs stýdenti Daryn Ábiljanov – KVI shaldyqqan naýqastardyń úıin aralap, ınektsııa jasady, emdedi jáne jaǵdaıyn baqylady.
Almaty qoǵamdyq baqylaý tobynyń úılestirýshisi Saıda Taýkeleva gýmanıtarlyq kómekti bólip, dárihana, medıtsınalyq mekemelerge monıtorıng júrgizdi jáne halyq arasyndaǵy karantındik sharalardyń saqtalýyn qadaǵalady.