Densaýlyq saqtaý mınıstri bıýdjettik qarajatty tıimdi paıdalanýdy talap etti
ASTANA. 21 aqpan. QazAqparat - Búgin alǵash ret QR Bas prokýratýrasy men QR Densaýlyq saqtaý mınıstrliginiń selektorlyq rejimdegi birlesken alqa otyrysy ótti.
Oǵan densaýlyq saqtaý uıymdarynyń jetekshilerinen bastap, aýdandyq aýrýhanalardyń bas dárigerlerine deıin qatysty. Bul týraly QR Densaýlyq saqtaý mınıstrliginiń baspasóz qyzmeti habarlady.
Alqa otyrysynda medıtsınalyq qurylǵylardyń jumys istemeýi, dárilik zattardy jáne medıtsınalyq tehnıkalardy satyp alýda azamattardyń quqyqtarynyń buzylýy, zerthanalyq qyzmet kórsetý, óńirlerde medıtsınalyq kadrlardy turaqtandyrý, epıdemıologııalyq turaqtylyqty qamtamasyz etý sııaqty keshendi jumystardy sheshýdi talap etetin ózekti máseleler qaraldy.
QR Densaýlyq saqtaý mınıstri Salıdat Qaıyrbekova alqa otyrysyna qatysýshylardy osy baǵytta qabyldanyp jatqan sharalar týraly habardar etti. Ol óńirlik densaýlyq saqtaý basqarmalarynan Biryńǵaı densaýlyq saqtaý júıesi sheńberinde bólingen bıýdjettik qarajatty tıimdi paıdalanýdy talap etti.
Medıtsınalyq qural-jabdyqtardyń satyp alý ashyqtyǵyn jáne jumys istemeı turyp qalýyn boldyrmaý úshin Densaýlyq saqtaý mınıstrligi densaýlyq saqtaý uıymdarynyń ótinimderine saraptama jasaıtyn bolady. ıAǵnı, eń aldymen olardyń sol qurylǵylarmen jumys isteı alatyn mamandarynyń bolýy jáne tıisti qural-jabdyqqa degen naqty qajettilikteri bolýy tıis.
Osy oraıda ótken jyly «aqsha naýqaspen birge júredi» qaǵıdasy boıynsha respýblıkalyq bıýdjetten 21 mlrd. teńge qarjy bólingenin aıta ketý kerek.
Sondaı-aq, mınıstr halyqty dári-dármekpen tolyqtaı qamtamasyz etý úshin oblystyq densaýlyq saqtaý basqarmalarynan durys josparlaýdy eskertti.
Densaýlyq saqtaý salasyndaǵy mamandar tapshylyǵyn sheshýde de óńirlik densaýlyq saqtaý basqarmalary tıimdi jumysty jolǵa qoıýy shart. Eń aldymen, olar óz óńirlerine qajetti mamandardy tartý úshin medıtsınalyq JOO-men tikeleı qarym-qatynas ornatyp, Densaýlyq saqtaý mınıstrligi bergen tizimmen ózderine kelgen mamandardy jumysqa ornalastyrýǵa kúsh salýy qajet. Jáne mamandardy sol jerlerde ustap, turaqtandyrý maqsatynda jaǵdaılaryn jasaǵan jón. ıAǵnı, memleket tarapynan jasalyp otyrǵan qamqorlyq aıasynda jalǵa beriletin páterlermen qamtamasyz etip, jeńildetilgen nesıeler berýdi jolǵa qoıý kerek.
Alqa otyrysynyń qorytyndysynda barlyq ózekti máseleler múddeli taraptardyń belsendi qatysýy arqyly sheshilýi tıistigi aıtyldy.
