Densaýlyq saqtaý mınıstri balalar óliminiń negizgi sebebin atady
«Elimizdegi balalar ólimi deńgeıi damyǵan eldermen salystyrǵanda joǵary bolýy múmkin. Biraq, bizdiń tolǵaq qaýipsizdigin qamtamasyz etip, balalar ólimin azaıtýǵa múmkindikterimiz kóbeıdi. Osyǵan baılanysty, júıeli túrde uzaqmerzimdi jáne qysqamerzimdi jumystar júrgizilip keledi. Ana men bala óliminiń eń basty sebebi – ásirese aýyldyq jerlerde bilikti mamandardyń jetispeýi», - dedi E. Birtanov mınıstrlikte ótken brıfıngte.
Onyń aıtýynsha, perzenthanalarda anestezıologtar, reanımatologtar jáne pedıatrlar jetispeıdi.
«Bul máseleni sheshý úshin medıtsınalyq mamandardy oqýdan keıin óńirlerge jiberdik. Sońǵy 7-8 jylda rezıdentýraǵa qabyldaýdy 10 esege arttyrdyq. Sońǵy úsh jylda akýsher-gınekologtar edáýir kóbeıdi, aldaǵy úsh jylda akýsher-gınekologtardyń jetispeýshiligi máselesi joıylady. Ózimizge qajetti mamandardy ázirleý úshin defıtsıt mamandyqtardy oqytýǵa kóbirek oryn bóldik», - dedi mınıstr.
Sonymen birge, ol aýylǵa kelgen jas mamandarǵa baspana berilmeı jatqanyn jetkizdi.
«Oblys pen aýdandardyń ákimderine jas mamandardyń ornyǵyp, jumys isteýi úshin jaǵdaı jasaýlaryn ótinemin. Biliktilikti kóterý máselesi de óte ózekti. Mınıstrlik tarapynan dárigerler men meıirbıkelerdiń biliktiligin arttyrýǵa qarajatty kóbeıttik. Bas dárigerler suranysqa ıe baǵyttar boıynsha qyzmetkerlerin oqýǵa jiberýi kerek. Bul mınıstrlik pen jergilikti atqarý organdarynyń birlesken mindeti. Biz árbir aýdannyń aýrýhanasyna qandaı mamandardyń qajet ekenin, olarǵa ne oqytý qajettigin jazyp qoıdyq», - dedi E. Birtanov.
Aıta keteıik, búgin Eljan Birtanov Atyraý oblysyndaǵy sábı ólimi týraly málimdeme jasady.