Densaýlyq saqtaý mınıstri Atyraýdaǵy ınfektsııalyq statsıonardy onlaın aralady
Densaýlyq saqtaý mınıstrligi baspasóz qyzmetiniń málimetinshe, mınıstr Alekseı Tsoı Atyraý oblysyndaǵy qazirgi epıdemıologııalyq jaǵdaıdy baǵalaý úshin №2 oblystyq aýrýhana men oblystyq jedel medıtsınalyq járdem stantsııasyn onlaın-rejımde aralaǵan.
Mınıstr qabyldaý, reanımatsııa jáne ınfektsııalyq bólimshelerdiń, sondaı-aq 103 dıspetcherlik qyzmeti men mobıldi ámbebap brıgadanyń jumysymen tanysty.
Qazir №2 oblystyq aýrýhanada COVID-19 koronavırýs ınfektsııasyna shaldyqqan patsıentterge arnalǵan 180 tósek bar. Onda 162 naýqas em alýda, tósek-orynnyń 90% bos emes. Aýrýhanadaǵy 100 oryn ottekti konsolmen qamtamasyz etilgen. Sondaı-aq, munda ókpeni jasandy jeldetetin 12 apparat bar.
Oblystyq densaýlyq saqtaý basqarmasynyń basshysy Nurlybek Qabdyqaparov qosymsha 90 tósektik ınfektsııalyq statsıonar salý josparlanyp otyrǵanyn aıtty. Demeýshiler ókpeni jasandy jeldetýge arnalǵan taǵy 30 jáne 100 oksıgenatsııa apparatyn satyp alyp bermek. Budan basqa, Qurmanǵazy aýdanyna kompıýterlik tomografııa apparaty alynady.
«Ortalyqtandyrylǵan ottegi júıesi joq jerlerge ottegi kontsentratoryn ornatý kerek. Eger ottegisiz jumys isteıtin kontsentrattar bolsa, ony satyp alý qajet. Mundaı apparattardy birinshi kezekte muqtaj statsıonarlarǵa jiberińizder», - dedi mınıstr.
Al, kezek oblystyq jedel medıtsınalyq járdem stantsııasyna kelgende mınıstr Alekseı Tsoı 103 dıspetcherlik qyzmetimen, jedel járdem qońyraýyn qabyldaý, patsıentterdiń jaǵdaıynyń aýyrlyǵyna baılanysty qońyraýlardy suryptaý jumysymen tanysty. Búginde 42 jedel járdem brıgadasy medıtsınalyq kómek kórsetedi. Stantsııada táýligine shamamen 1 100-1 200 shaqyrý qabyldanady. Júkteme eki esege artqan.
Mınıstr mobıldi ámbebap brıgadanyń jumysyn kúsheıtýdi, ambýlatorııalyq dári-dármekpen qamtamasyz etý aıasynda dárilik zattardy ýaqytyly jetkizýdi, sonymen qatar, ınfektsııalyq statsıonarlardan shyqqan naýqastardyń ambýlatorııalyq emine erekshe nazar aýdarýdy tapsyrdy.
Mobıldi brıgada bir táýlikte 35 qońyraýǵa qyzmet kórsetedi. Mamandar respıratorlyq aýrý boıynsha shaqyrǵandardan PTR-test kómegimen COVID-19 ınfektsııasyna analız alady. Patsıentti qarap, satýratsııasyn ólsheıdi.
Alekseı Tsoı onlaın túrde nysandardy aralap bolǵan soń, oblystyq densaýlyq saqtaý basqarmasynyń basshysymen óńirdegi epıdemıologııalyq jaǵdaıǵa qatysty birqatar máselelerdi talqylady. Atap aıtqanda, ken oryndarynda indettiń órshýiniń aldyn alý, jaǵdaıy aýyr patsıentterdi shuǵyl emdeýdiń ádisin ázirleý, medıtsına mamandarynyń dıfıtsıt máselesin sheshý syndy problemalar sóz boldy.
Densaýlyq saqtaý mınıstri koronataksı jumysyna, epıdemıologııalyq jaǵdaılarda TMKKK men MÁMS paketterin qarjylandyrýdy qaıta qaraý máselesine basa nazar aýdardy.
«Koronataksıge basa nazar aýdarý kerek. Bul iske ishi taza kez-kelgen taksı aralasa alady. Eger emhanada kólik jetpeı jatsa, bul jergilikti ákimdik kómektespeıdi degen sóz», - dedi mınıstr.
Sondaı-aq, mınıstr ınfektsııalyq statsıonardaǵy patsıenttermen vırtýaldy túrde kezdesip, olardyń tez saýyǵyp ketýin tiledi.
Avtor: Bek Mustafa