Densaýlyq saqtaý mınıstri Almatydaǵy №7 aýrýhanaǵa bardy

ALMATY. QazAqparat - Búgin Densaýlyq saqtaý mınıstri Alekseı Tsoı bastaǵan delegatsııa Almaty qalalyq №7 klınıkalyq aýrýhanasyna bardy, dep habarlaıdy QazAqparat tilshisi.

Mınıstrdiń bul sapary qala basshylyǵymen epıdemııalyq jaǵdaıdy talqylap, medıtsınalyq mekemelerdegi koronavırýspen kúres jumysymen tanysýdy kózdeıdi.

Mınıstrlik delegatsııasymen birge №7 aýrýhanaǵa Almaty qalasy ákiminiń orynbasary Erjan Babaqumarov, Almaty qalasynyń bas sanıtar dárigeri Jandarbek Bekshın, Almaty qalalyq qoǵamdyq densaýlyq saqtaý basqarmasynyń jetekshisi Narıman Tabynbaev keldi.

«Almatyǵa jumys sapary kezinde Densaýlyq saqtaý mınıstri Alekseı Tsoı karantın jaǵdaıyndaǵy statsıonar jumysymen, aýrýhananyń indet báseńsigen jaǵdaıda nemese epıdahýal kúrt nasharlaǵan jaǵdaıdaǵy josparymen tanysty. Sonymen qatar mınıstrge birneshe bólimsheler, bólmelerdi aýmaqqa bólý, medıtsınalyq gazben qamtamasyz etý júıesi, aýrýhana men emhana kireberisinde ornatylǵan dene qyzýyn ólsheý teplovızorlary, KVI taralmaýyna yqpal etetin medıtsınalyq qaldyqtardy tez joıatyn keshen kórsetildi» dep habarlady №7 aýrýhananyń baspasóz qyzmeti.

Almaty qalalyq №7 klınıkalyq aýrýhanasynyń bas dárigeri Manas Ramazanov aýrýhananyń qala statsıonarlarynyń emdeý algorıtmine sáıkes tolyq daıyn ekendigin málimdedi.