Densaýlyq saqtaý kodeksi jobasyndaǵy daýly máseleler oń sheshimin tapty- Nyǵmatýlın
NUR-SULTAN. QazAqparat - Búgin Májiliste Palata Spıkeri Nurlan Nyǵmatýlın «Nur Otan» partııasy fraktsııasynyń keńeıtilgen otyrysyn ótkizdi. Depýtattar halyq densaýlyǵy týraly kodekspen jumys isteý barysynda azamattyq qoǵamnyń pikirin eskerdi, dep habarlaıdy QazAqparat Májilistiń baspasóz qyzmetine silteme jasap.
Qazirgi ýaqytta Májilis «Halyq densaýlyǵy jáne densaýlyq saqtaý júıesi týraly» Kodeks jobasyn birinshi oqylymda qaraýǵa daıyndyq ústinde.
«Nur Otan» partııasy fraktsııasynyń depýtattary zań jobasynyń eń rezonanstyq normalaryn memlekettik organdardyń basshylarymen, belgili qoǵam qaıratkerlerimen, medıtsınalyq qoǵamdastyq pen azamattyq qoǵam ókilderiniń qatysýymen fraktsııanyń keńeıtilgen otyrysynda talqylady.
Fraktsııanyń keńeıtilgen otyrysyn ashqan Májilis Tóraǵasy Nurlan Nyǵmatýlın:
- Biz densaýlyq máselesin fraktsııa otyrysynda talqylaý týraly arnaıy sheshim qabyldaǵan bolatynbyz. Ózderińiz bilesizder bul másele búginde búkil halyqtyń nazarynda. Árıne densaýlyq máselesi ol bizdiń memlekettiń basty baılyǵy. Sol úshin osy Densaýlyq Kodeksi ázirlendi. Qazir Májilistiń qaraýynda. Kóptegen usynystar, pikirler aıtylyp jatyr. Bizdiń depýtattarymyz aımaqtarda bolǵan kezde de osy Kodeks boıynsha kóptegen talqylaý boldy. Búgin de ashyq, jarııa túrde taǵy da jan jaqty talqylaıtyn bolamyz. Nátıjesinde joǵary deńgeıdegi sapaly zań qabyldaýymyz kerek, - dedi.
Nurlan Nyǵmatýlın Kodeks jobasy Májiliske kelip túsken sátten bastap, depýtattardyń qatysýymen túrli alańdarda qyzý talqylanǵanyn aıtty.
Nátıjesinde, kóptegen kúrdeli máseleler boıynsha ymyraǵa keldi. Atap aıtqanda, bul transplantologııa máselesi.
Otyrysta A.N. Syzǵanov atyndaǵy ulttyq ǵylymı hırýrgııa ortalyǵynyń Basqarma tóraǵasy Bolatbek Baımahanov, «Ómir Syıy» Respýblıkalyq qoǵamdyq qorynyń basshysy Sandýǵash Orynbaeva men «Aman-saýlyq» Qoǵamdyq qorynyń jetekshisi Baqyt Túmenova óz ustanymyn bildirdi.
Al shetelge aǵzalardy eksporttaý normasyna qatysty Májilis Tóraǵasy Nurlan Nyǵmatýlın Kodeks jobasynda bizdiń memleketimizden tys jerde júrgen Qazaqstan azamattaryna medıtsınalyq kómek kórsetý qajet bolǵan jaǵdaıda ǵana transplantatsııalaý úshin eksporttaý múmkindigi qarastyrylǵanyn atap ótti.
Sondaı-aq, fraktsııa otyrysynda vaktsınatsııa normasyna erekshe nazar aýdaryldy.
Bul jaıynda juqpaly aýrýlar boıynsha mamandar, mektepke deıingi mekemelerdiń ókilderi jáne Qazaqstandaǵy bala quqyqtary jónindegi ýákil Arýjan Saın óz oılarymen bólisti.
Qoǵamdaǵy túrli pikirlerdi eskere otyryp, jumys toby halyqtyń qaýipsizdigin qamtamasyz etetin, profılaktıkalyq egýler mindetti jáne erikti bolyp bólingenin usyndy. Qazaqstanda turaqty turatyn adamdar mindetti profılaktıkalyq egýlerden ótýi kerek. Eger balanyń densaýlyǵynda medıtsınalyq qarsy kórsetilimder bolmasa mindetti vaktsınatsııalardyń tizimine sáıkes vaktsına jasalady.
Alaıda, sapasyz vaktsınalardy jetkizý, vaktsınalardy saqtaý, tasymaldaý jáne paıdalaný erejelerin saqtaýǵa qatysty jaýapkershilikti kúsheıtý usynylady. Osyǵan sáıkes, Taýarlar men qyzmetter qaýipsizdigi jáne sapasyn baqylaý komıtetiniń quzyreti kúsheıtilmek.
Sonymen qatar, naýqastyń ómirin jasandy qoldaý sharalaryn toqtatý týraly ortaq ustanym ázirlendi, ol týystarynyń kelisiminsiz bul shara toqtamaıdy.
Fraktsııanyń keńeıtilgen otyrysynda Densaýlyq saqtaý kodeksi jobasynyń árbir normasy jan-jaqty, tereń talqylandy.
Otyrysta Tutynýshylar quqyǵyn qorǵaýǵa arnalǵan ulttyq koalıtsııa Tóraǵasy Murat Ábenov, saıasattanýshy Danııar Áshimbaev sóz sóıledi.
