Densaýlyq saqtaý ınfraqurylymyna 2025 jylǵa deıin qansha qarjy qajet
Mınıstrdiń sózine qaraǵanda, sońǵy úsh jylda óńirler jalpy somasy 52 mlrd teńgege 111 densaýlyq saqtaý salasyndaǵy memlekettik-jekeshelik áriptestik jobalaryn iske asyrdy. Konkýrstyq rásimderdi ótkizý satysynda taǵy da 93 joba bar, 83 joba ázirleý satysynda. Óńirler basymdyqpen ambýlatorııalyq-emhanalyq qyzmet nysandaryn salý jáne ony paıdalanýǵa berý boıynsha jobalardy, sondaı-aq medıtsınalyq tehnıkamen jaraqtandyrý boıynsha jobalardy iske asyrýda.
«Óńirlerdiń ákimdikteri bekitken densaýlyq saqtaý ınfraqurylymyn damytýdyń perspektıvalyq josparlaryna sáıkes, 2025 jylǵa deıingi ınvestıtsııalarǵa qajettilik 1,3 trln teńgeden astam qarjyny qurady. Ambýlatorııalyq-emhanalyq jáne statsıonarlyq nysandar qurylysynyń jobalaryn iske asyrý úshin medıtsınalyq qyzmetter úshin tarıfti tóleýmen «servıstik MJÁ» modelin, sondaı-aq nysandy memlekettik menshikke bergen jaǵdaıda ınvestıtsııalardy óteýmen kelisimsharttardy paıdalaný usynylady», - dedi E. Birtanov.
Onyń paıymynsha, jetkilikti qarajat mólsherin generatsııalaýǵa qabiletsiz jobalar boıynsha memlekettik bıýdjettik qarjylandyrýdy paıdalaný qajet. Іri aýrýhanalar ınfraqurylymdyq MJÁ tetigi boıynsha iske asyrylatyn bolady.
«2019 jylǵy maýsymnyń sońyna deıin ózektendirilgen Óńirlik damý josparlary negizinde 2026 jylǵa deıingi QR Densaýlyq saqtaý ınfraqurylymyn damytýdyń biryńǵaı perspektıvalyq jospary bekitiletin bolady. Osylaısha, ınfraqurylymdy damytýdyń perspektıvalyq josparlary halyqtyń is júzindegi qajettiligine sáıkes keletin strategııalyq josparlaý quraly boldy», - dedi mınıstr.