Densaýlyq saqtaý basqarmalaryn qaıtadan mınıstrlikke baǵyndyrý kerek - mınıstr
«Halyqtyń densaýlyǵyn saqtaý men medıtsınalyq kómek sapasyn arttyrýdyń negizgi máseleleri jergilikti atqarý organdarynyń quzyrynda bola tura, qarajat jetkilikti bola tura, memlekettik baǵdarlama sharalarynda alshaqtyq týyp, óńirlerde oryndalmasa, qısyndy suraq týyndaıdy. Jalpy jabdyqtaýǵa 49 mlrd teńge bólinedi. Keıbir ákimdikter jylyna 1-6 mlrd teńgeni materıaldyq jabdyqtaýǵa jumsaıdy», - dedi Eljan Birtanov elordada mınıstrlik alqasynyń keńeıtilgen otyrysynda.
Mınıstr qarajat pen normatıvti-quqyqtyq bazanyń jáne JOO bar ekenin aıtyp, sáıkesinshe, atqarý tártibi jóninde másele týyndaıtynyn jetkizdi.
«Densaýlyq saqtaý basqarmalaryn Densaýlyq saqtaý mınıstrligine qaıta baǵyndyrý máselesin kóteremiz. Muny Úkimet pen Prezıdent Ákimshiligine deıin jetkizemiz. Kelesi memlekettik baǵdarlamalardyń nege oryndalmaǵany týraly Sizderdi turǵyzyp, surap otyrǵymyz kelmeıdi. Densaýlyq saqtaý basqarmalarynyń basshysyn mınıstrlik taǵaıyndaıtyn burynǵy júıeni qaıtarý kerek», - dedi Eljan Birtanov.
Aıta keteıik, elordada 2019 jyldyń jartyjyldyǵyna arnalǵan QR Densaýlyq saqtaý mınıstrligi alqasynyń otyrysy ótip jatyr. Otyrysta 2016-2019 jyldary densaýlyq saqtaýdy damytýǵa arnalǵan «Densaýlyq» memlekettik baǵdarlamasy, 2019-2020 jyldardy qamtıtyn bastapqy medıtsınalyq-sanıtarlyq kómekti damytý sharalarynyń jospary, 2019 jylǵa arnalǵan QR ana ólimin azaıtý boıynsha jedel jospar, 2019-2021 jyldarǵa arnalǵan balalar ólimin azaıtý boıynsha sharalar jospary, kadrlyq qamtamasyz etý jáne densaýlyq saqtaý salasynyń qyzmetkerlerin áleýmettik qoldaý, densaýlyq saqtaý salasyna ınvestıtsııalar tartý máselesi qaralady.