DENSAÝLYQ: Raıhan gúliniń densaýlyqqa paıdasy qandaı?
ASTANA. QazAqparat - Raıhan gúli adam aǵzasyn túrli aýrýlardan, ásirese, taz aýrýynan, zııandy bakterııalardan saqtaıdy.
Raıhan gúliniń japyraǵy men gúlinde hosh ıisti efır maıy bolǵandyqtan, parfıýmerııada qoldanylady jáne medıtsınada dári jasalady, ara gúlinen bal jınaıdy. Sonymen qatar, gúldiń quramynda V1, V2, RR dárýmenderi jáne askorbın qyshqyly bar. Qazaqstanda búl gúldiń názik, úzilme, búnge, pamıralaı, ıisti jáne kelimsek degen 6 túri ósedi. Nazarlaryńyzǵa raıhan gúliniń densaýlyqqa paıdasy, emdik qasıetteri jóninde azdaǵan aqparat usynamyz.
Raıhan gúli - búırekke jaqsy áser beredi. Quramyndaǵy efır maıynyń arqasynda búırektegi tasty túsirýgekómektesedi. Sonymen qatar, raıhan gúliniń tunbasy joǵary temperatýrany tómendetip, jótel kezinde jáne sýyq tıip aýyrǵanda alǵashqy kómek kórsete alady. Ol bas aýrýyn emdeıtin qasıetke de ıe. Medıtsınalyq nesep aıdaǵysh jáne ishek qurtty joıatyn dármekterdiń ornyn almastyrady. Eger de aýyz qýysynan jaǵymsyz ıis shyqqanyn qalamasańyz, raıhan gúliniń bir talyn shaınańyz. Sonda ol barlyq bakterııalardy óltirip, aýyz qýysynan shyqqan jaǵymsyz ıisti joıady.
Raıhan gúli - ımmýnıtetti kóterýge kómektesedi. Sonymen qatar, teri qyshyp, dýyldaıtyn bolsa, oǵan raıhan gúldiń tunbasy taptyrmas em. Ol úshin 2 as qasyq raıhan gúliniń japyraqtaryn alyp jarty lıtr sýǵa qaınatý kerek. Sodan soń ony tundyryp, sýytyńyz. Osyndaı qaınatpany kúnine 3 ret jarty staqannan qabyldap otyrsa, tez jazylyp ketedi.
Raıhan gúldiń zııandy tustary
Qaı nárseniń de paıdaly ári zııandy jaqtary bolady. Raıhan gúlin júkti áıelder qabyldaýǵa jáne epılepsııamen aýyratyndarǵa, júreginiń ıshemııalyq aýrýy bar jáne ınfarkt, ınsýlt alǵan adamdarǵa bul dárilik shópti ishýge tıym salynǵan. Raıhan gúl tunbasyn shekten tys ishýge de bolmaıdy.
