«Densaýlyq» poıyzynyń Lepsi stansasynda jumys istemeı turǵany shyndyqqa janaspaıdy - A. Baltanova
Onyń aıtýynsha, «Densaýlyq» medıtsınalyq poıyzy Lepsi kentinde bir kúnniń ishinde 172 adamdy qabyldaǵan.
«Densaýlyq» poıyzynda norma boıynsha kúnine tańǵy saǵat 09:00-den keshki saǵat 18:00-ge deıin 50-60 adam qabyldanady. Al, Lepsi kentinde «Densaýlyq» poıyzynyń dárigerleri bir kúnde 172 adam qabyldaǵan. Odan keıin, Mataı stansasyna barǵan. Ol jerde birinshi kúni - 250 adam, al ekinshi kúni - 180 adam medıtsınalyq tekserýden ótken. «Densaýlyq» poıyzy bas dárigeriniń aıtýynsha, poıyz qazir Egindisaı stansasynda tur. Túske deıin-aq, dárigerler - 70-ten astam jergilikti turǵyndy qabyldap, olarǵa medıtsınalyq kómek kórsetti. Turǵyndar arasynan bir adamnyń qaterli isikke shaldyqqany anyqtaldy. Ol óziniń osy aýrýǵa shaldyqqanyn tipti bilmegen. Qazir, oǵan emdelýge joldama berildi. Al bir ınternet paıdalanýshynyń Instagram áleýmettik jelisinde «Densaýlyq» poıyzynyń Lepsi stansasynda jumys istemeı turǵany jaıly málimdemesi shyndyqqa janaspaıdy», - dedi A. Baltanova.
Aıta ketelik, osydan birneshe kún buryn Elı Alıeva esimdi volonter Instagram áleýmettik jelisindegi óziniń jeke paraqshasynda Lepsi kenti mańynda turǵan «Densaýlyq» poıyzy qyzmetkerleriniń jergilikti turǵyndarǵa medıtsınalyq qyzmet kórsetpeı turǵany jaıly habarlaǵan bolatyn. Bul jańalyq, árıne, ınternet paıdalanýshylarynyń yzasyn týdyrdy.
Esterińizde bolsa, «Densaýlyq» medıtsınalyq poıyzy jobasyn Qazaqstan boıynsha 2010 jyly QR Densaýlyq saqtaý mınıstrligi, QR Tótenshe jaǵdaılar jónindegi mınıstrligi jáne «Qazaqstan temir joly»Ulttyq kompanııasy» AQ birlesip qolǵa alǵan bolatyn.
Qazir, Almaty oblysyna qarasty «Densaýlyq» poıyzy - 9 vagonnan turady. 2 vagon - jatyn orynǵa arnalǵan. 4 vagonda emdeý rásimderi júrgiziledi. Bir vagon dári-dármekter saqtaýǵa arnalsa, bir vagon tamaqtanýǵa, taǵy bir vagon avtonomııalyq energııamen qamtamasyz etýge arnalǵan.
Poıyzda barlyǵy 28 medıtsına qyzmetkeri jumys isteıdi. Olardyń arasynda kardıolog, otashy, endokrınolog, ýrolog, onkolog, pedıator, stomatolog, dermatolog, gınekolog mamandar bar. Munda ÝDZ, flıýorografııa, FGDS sekildi qyzmetter kórsetiledi.