«Densaýlyq» poıyzy jolǵa shyqty
ALMATY. QazAqparat - «Qazaqstan temir joly» memlekettik kompanııasy men S.D.Asfendııarov atyndaǵy Qazaq Ulttyq medıtsına ýnıversıteti jáne medıtsınalyq saqtandyrý qorymen birige otyryp, medıtsınalyq «Densaýlyq» poıyzyn attandyrdy. Segiz aı boıy mamandar Qazaqstan oblystarynyń temir jol beketterinde aýyl turǵyndaryn qabyldaıtyn bolady, dep habarlaıdy QazAqparat tilshisi.
«Densaýlyq» poıyzynda rentgen zerthanasy, flıýorografııa, EKG, qursaq qýysynyń ÝDZ, FGDS, ÝZDG qamtylǵan. Stomatolog-hırýrg, terapevt, nevropatolog, kardıolog, hırýrg, gınekolog, oftalmolog, pedıatr, otolarıngolog, rentgenolog, mammolog, somnolog, onkolog, zerthanalyq dáriger-laborant, qyzmettik dıagnostıka dárigeri aýyl turǵyndaryn tegin qaraıdy.
Poıyz 9 vagonnan turady. Onyń ishinde tórteýi - emdik-dıagnostıkalyq protsedýralar júrgizý úshin, al ekeýinde qyzmetkerler ornalassa, bireýinde dári-dármekter saqtalady. Sonymen qatar, meıramhana vagony men avtonomııalyq qýat únemdeý vagony da bar.
«Densaýlyq» poıyzy 195 beketke toqtap, 40 myń adamnyń densaýlyǵyn qaraýǵa ázir. Sapaly stomatologııalyq em jáne kishigirim ota jasalýy da ábden múmkin. Poıyz óz jumysyn 2019 jyl 29 sáýirden bastap, 21 jeltoqsanǵa deıin 20 myń shaqyrym joldy eńsermek.
