«Densaýlyq» poıyzy Mańǵystaýǵa jetti
ASTANA. QazAqparat - Úsh aı boıy elimizdiń shalǵaıdaǵy temirjol beketterine toqtap, eldi-meken turǵyndaryna kómek kórsetken «Densaýlyq» jáne «Salamatty Qazaqstan» medıtsınalyq poıyzy Mańǵystaý oblysyna keldi, dep habarlaıdy óńirlik ákimdiktiń baspasóz qyzmeti.
Atalǵan poıyz qyrkúıektiń 5 men 25 aralyǵynda Mańǵystaý oblysynyń birneshe eldi-mekenin aralap, bilikti dárigerler turǵyndarǵa medıtsınalyq kómek kórsetedi. Medıtsınalyq brıgada quramynda terapevt, pedıatr, nevropatolog, okýlıst, LOR, gınekolog, hırýrg, ýrolog, mammolog, stomatolog sııaqty dárigerler bar.
Poıyz zamanaýı dıagnostıkalyq quraldarmen jabdyqtalǵan, onyń ishinde kompıýterlik spırometrlik júıemen, ehoentsefalografpen, dıagnostıkalyq júkteme synaqtaryn júrgizý úshin kardıologııalyq monıtorıng júıesimen, sondaı-aq rentgen, stomatologııalyq, LOR jáne oftalmologııalyq jabdyqtardyń sońǵy úlgilerimen qamtamasyz etilgen.
2018 jyly «Densaýlyq» poıyzy Atyraý, Mańǵystaý, Qyzylorda, Túrkistan jáne Almaty oblystary boıynsha, barlyǵy 71 beketke toqtaıdy. «Salamatty Qazaqstan» poıyzymen Shyǵys Qazaqstan, Pavlodar, Qaraǵandy jáne Qostanaı oblystarynyń shalǵaıdaǵy 57 stantsııanyń turǵyndaryn qamtý josparlanyp otyr.
Stantsııalardyń turǵyndary joǵary bilikti medıtsınalyq kómek, sonyń ishinde shaǵyn hırýrgııalyq operatsııalar, sondaı-aq joǵary sapaly stomatologııalyq kómek ala alady.
Esterińizge sala ketsek, «Medıtsınalyq poıyzdar» jobasy alǵash ret 2010 jyly iske qosylǵan bolatyn. Osy ýaqyt ishinde konsýltatsııalyq-dıagnostıkalyq poıyzdardan elimizdiń barlyq oblystarynan 1326 stantsııa turǵyndary tekserýden ótti. Mamandar 379 000 qazaqstandyqty tekseristen ótkizdi, onyń 83 806 balalar. Dárigerlik qabyldaýlardyń jalpy sany shamamen 2,5 mln qurady.
Jobany «Samuryq-Qazyna» AQ kompanııalar toby atynan «Samruk-Kazyna Trust» áleýmetti jobalardy damytý qory jáne QR Densaýlyq mınıstrligi, sonymen qatar «Qazaqstan Temir Joly» UK» AQ-nyń «Áleýmettik jobalar» Korporatıvtik qory júzege asyrady.
