«Densaýlyq» poıyzy Mańǵystaýda bir aıdan astam ýaqyt bolady
AQTAÝ. QazAqparat - QR ІІM TJK «Apattar medıtsınasynyń temirjol gospıtaldary» AQ «Densaýlyq» poıyzy keshe Mańǵystaý oblysy Turysh stansasyna kelip, búginnen bastap naýqastardy qabyldaýda. Poıyz temirjol baǵytynda ornalasqan oblystyń 22 eldi mekenin aralap, ár stansada 1-3 kún boıy jumys jasaıtyn bolady, dep habarlaıdy «QazAqparat» HAA tilshisi.
Poıyz Mańǵystaý oblysynyń turǵyndaryna 31 mamyrǵa deıin qyzmet kórsetetin bolady. Poıyz jumysynyń maqsaty - shaǵyn eldi mekenderdegi, sondaı-aq jeke aýmaqtarda ornalasqan turǵyndarǵa joǵary sapaly medıtsınalyq qyzmet kórsetý. Onyń quramynda 18 dáriger jumys jasaıdy, olar qajetti dıagnostıkalyq qurylǵylarmen jabdyqtalǵan.
«Biz keshe Turysh stansasyna kelip jettik. Qurylǵylardy jumys jasaýǵa daıyndap qoıdyq. Búgin tańǵy saǵat 9-da naýqastardy qabyldaı bastadyq. Basqa eldi mekenderde de osylaı jumys jasaıtyn bolamyz. Beıneý (24 sáýir kúni kelemiz), Shetpe (3 mamyr), Jańaózen qalasy (10 mamyr), Qulsary (18 mamyr), Maqat (21 mamyr), Aqqystaý (28 mamyr) stansalarynda úsh kúnnen bolamyz», - dedi «Densaýlyq» poıyzynyń bas dárigeri Ǵızzat Samatuly.
Mamandar kúnine 250 naýqasty qabyldaýǵa qaýqarly. Bas dárigerdiń aıtýynsha, bir jarym aıda mamandar 39 jumys kúnin jasaıdy. Demek, olar shamamen 10 myń naýqasty qabyldaıdy.
