«Densaýlyq» poıyzy Mańǵystaý óńirin aralaýda
ASTANA. QazAqparat - «Densaýlyq» poıyzy 2017 jylǵy 20 sáýirden bastap Mańǵystaý oblysynyń aýmaǵyn aralaýda.
Kestege sáıkes, aǵymdaǵy jylǵy mamyr aıynyń sońyna deıin temirjol boıynda ornalasqan eldi mekenderde bilikti medıtsınalyq kómekter kórsetý josparlanǵan.
7 mamyrǵa deıin «Densaýlyq» konsýltatıvti-dıagnostıkalyq medıtsınalyq poıyzynda Mańǵystaý oblysynyń Turysh, Sam, Beıneý, Aqjigit, Ústirt, Saı Ótes, 10 razezd, Shetpe beketteriniń turǵyndary tekseristen ótti.
Mańǵystaý oblysynyń Tótenshe jaǵdaılar departamentinen málim etkendeı, barlyǵy medıtsınalyq kómekpen 2990 adam qamtyldy, onyń 2124 - balalar. Turysh aýylynda - 259 adam, Sam stansasynda -175, Beıneýde - 833, Aqjigitte - 523, Ústirtte - 327, Saı Óteste - 375, 10 razezde - 87, Shetpede 411 adam kómekke júgindi.
Poıyz barlyq qajetti dıagnostıkalyq apparatýramen jabdyqtalǵan jáne QR ІІM TJK «Apattar medıtsınasynyń temirjol gospıtaldary» AQ-nyń joǵary bilikti medıtsınalyq kadrlary, atap aıtqanda, 18-den astam dáriger mamandary qyzmet kórsetedi. Olar ınternet jáne telefon baılanysymen qamtamasyz etilgen. Sondaı-aq respýblıkamyzdyń jáne TMD jetekshi ǵylymı medıtsınalyq ortalyqtarymen on-line rejiminde naýqastarǵa konsýltatsııa berýge arnalǵan telemedıtsınalyq jabdyqpen jaraqtalǵan.
