«Densaýlyq» poıyzy eldiń ońtústik óńirlerindegi saýyqtyrý mıssııasyn aıaqtady
ASTANA. 25 mamyr. QazAqparat /Gúlmıra Álıakparova/ - Ótken jeksenbide Almaty-2 vokzalyna arnaıy mamandandyrylǵan «Densaýlyq» poıyzy saparynan oraldy.
Bul týraly «Qazaqstan temir joly» kompanııasynan habarlady.
Poıyz Qazaqstannyń ońtústik óńirlerinde saýyqtyrý mıssııasyn oryndap qaıtty. Sóıtip, bıylǵy jylǵy jobanyń alǵashqy kezeńin aıaqtap, ekinshi saparǵa daıyndyqqa kiristi.
«Qazaqstan temir joly» UK» AQ men QR Tótenshe jaǵdaılar mınıstrligi birlesip shyǵarǵan poıyz ústimizdegi jyldyń 17 qańtary men 22 mamyry aralyǵynda úlkendi-kishili 56 stansa men razezde boldy. Osy ýaqyt aralyǵynda «dóńgelek ústindegi emhanaǵa» 24 myńnan astam adam qaraldy.
Poıyzdyń medıtsınalyq brıgadasy «sońǵy naýqasqa deıin» qaǵıdaty boıynsha jumys istedi. Bilikti dárigerler 173 kishigirim hırýrgııalyq ota, 50 myńǵa jýyq zerthanalyq zertteý jasady. Kómek surap kelgen ár adam ortasha alǵanda 6-7 dárigerdiń qabyldaýynda boldy.
Almaty-2 stansasynda «Densaýlyq» poıyzyn «Apattar medıtsınasynyń temirjol gospıtaldary» AQ fılıaly - «Almaty-1 temir jol aýrýhanasynyń» dırektory Murat Qýatov qarsy aldy.
Saýyqtyrý kesheniniń bas dárigeri Omarjan Mahmutov, «Densaýlyq» poıyzynyń medıkteri kóshpeli jaǵdaılarda joǵary professıonaldyq deńgeıde eńbek etkenin atap ótti.
Medıtsına mamandarymen birge ózderiniń qyzmettik mindetterin poıyzdyń qozǵalysyn aldyn ala josparlanǵan keste boıynsha qamtamasyz etken temirjolshylar abyroımen oryndap shyqty. Barlyq jol boıynda poıyz sýmen jáne elektr qýatymen qamtamasyz etilip, medıtsına mamandarynyń turýyna qajetti jaǵdaılar jasalyp otyrdy. Munda «Jolaýshylar tasymaly» AQ «Ońtústik» fılıaly poıyz brıgadasynyń eńbegi zor.
Memleket basshysy Nursultan Nazarbaev bıylǵy «Bolashaqtyń irgesin birge qalaımyz!» atty Qazaqstan halqyna Joldaýynda kóliktik medıtsınanyń mańyzdylyǵyn erekshe atap ótken bolatyn. Temirjolshylar men tótenshe jaǵdaılar mınıstrligi Elbasynyń memlekettiń basty baılyǵy - adamnyń densaýlyǵyn nyǵaıtý, qoǵamdaǵy áleýmettik turaqtylyqty saqtaý, árbir qazaqstandyqty qoljetimdi dárigerlik qyzmetpen qamtý, ult densaýlyǵyn nyǵaıtý tapsyrmalaryn abyroımen oryndap keledi.
