«Densaýlyq» poıyzy Atyraý turǵyndaryna medıtsınalyq kómek kórsetýde
ATYRAÝ. QazAqparat «Densaýlyq» poıyzynyń dárigerleri Atyraý oblysynyń Maqat aýdanynyń turǵyndaryna medıtsınalyq kómek kórsetip jatyr, dep habarlaıdy QazAqparat tilshisi.
Keshe «Densaýlyq» poıyzy Atyraý oblysynyń Maqat aýdanyna kelip jetti. Poıyz jumysynyń resmı ashylý saltanatyna Atyraý oblysy TJ departamenti bastyǵynyń orynbasary polkovnık Zamır Berdashev qatysyp, óz sózinde «Densaýlyq» poıyzynyń ujymyna sáttilik tiledi. 
«Kásibı dárigerler turǵyndarǵa tańerteńnen bastap medıtsınalyq qyzmetter kórsetti. Poıyzda terapevt, nevropatolog, oftalmolog, otorınolarıngolog, gınekolog, hırýrg, ýrolog, ÝDZ dárigeri, bala dárigeri, endoskopıst, rentgenolog, kardıolog, stomatologtar medıtsınalyq qyzmet kórsetedi. Barlyǵy da birinshi jáne joǵary sanatty, tájirıbesi mol dárigerler» dep habarlady Atyraý oblystyq TJD memlekettik til jáne aqparat tobynan.
Aıta ketý kerek, «Dóńgelekti emhana» jumysy atyraýlyqtardyń arasynda úlken suranysqa ıe. Ár stansada turǵyndar kóptep jınalady. Oblys ortalyǵynan jáne elimizdiń Almaty, Astana, Qyzylorda, Aqtóbe qalalarynan kelgen joǵary bilikti mamandar tegin medıtsınalyq kómek kórsetetinin estigen turǵyndar eń shalǵaı aýdandardan osynda jetti. Barlyǵy da ózderiniń densaýlyq jaǵdaıyn teksertýge asyq. Kóbi balalaryn alyp kelgen.
Poıyz kelgeli 141 adam, onyń ishinde 11 bala medıtsınalyq tekseristen ótti. Emdelýshilerge tıisti alǵashqy dárigerlik kómek kórsetilip, kásibı keńester berildi. Jaqyn mańdaǵy medıtsınalyq ortalyqtarǵa em qabyldaýǵa joldama usynyldy. Turǵyndar «Densaýlyq» poıyzynyń dárigerlerine alǵys aıtyp, osyndaı qaıyrymdylyq aktsııalaryn jıi ótkizip turý keerktigin atap ótti.
Poıyz josparlanǵan baǵyt boıynsha júredi. Alda Dossor, Toman, Aqqystaý, Naryn, Isataı, Afanasevo, Ganıýshkıno, Jamansor, Muqyr stansalary. Sońǵy aıaldama - Saǵyz stansasy.
