«Densaýlyq poıyzy» Atyraý oblysyna jetti
ATYRAÝ. QazAqparat - «Densaýlyq» poıyzy Atyraý oblysyna keldi, dep habarlaıdy QazAqparat.
Poıyz óńirdegi jumysyn Maqat aýdanyndaǵy Maqat stansasynan bastady. Poıyz 9 vagonnan turady. Onyń 4-ýi emdeý-dıagnostıkalyq protsedýralaryna, 4-ýi medıtsınalyq personaldarǵa, 1-ýi medıtsınalyq preparattardy saqtaýǵa arnalǵan. Sondaı-aq restoran vagony men energııamen qamtamasyz etý vagony bar.
Brıgada quramynda 1 dáriger, 6 medbıke, 2 laborant bar. Qabyldaý jumystaryn, terapevt, nevrapotolog, oftalmolog, otorınolarıngolog, gınekolog, hırýrg, ýrolog, ÝZI dárigeri, endoskopshy, rentgenolog, kardıolog, stomatolog, pedıatr-dáriger júrgizedi. Bul dárigerlerdiń barlyǵy Atyraý temirjol aýrýhanasy men Almaty, Astana, Qyzylorda men Aqtóbeniń klınıkalarynyń birinshi jáne joǵary dárejeli mamandary. Bilikti dárigerler medıtsınalyq qyzmet kórsetip, keńes beredi.
«Densaýlyq» poıyzy jumysynyń alǵashqy kúninde 141 adam medıtsınalyq tekserýden ótip, dárigerlerdiń keńesin aldy. Olardyń 11-i balalar. Patsıentterge, birinshi kezekte qajetti kómek kórsetilip, kásibı keńes berilip, densaýlyqtaryn odan ári túzeý úshin jaqyn mańdaǵy medıtsına ortalyqtaryna em alýǵa joldama berildi.
«Poıyz tıisti kestesinen jańylǵan joq. Atyraý oblysynda olar Dossor, Týmannyı, Aqqystaý, Naryn, Isataı, Afanasev, Ganıýshkıno, Jamansor, Muqyr jáne sońǵy Saǵyz stansalarynda bolady»,-dep habarlady Atyraý oblystyq Tótenshe jaǵdaılar departamentiniń baspasóz qyzmeti.
Aıta keteıik, «Qazaqstan temir joly» Ulttyq kompanııasy QR Tótenshe jaǵdaılar komıtetimen birlese otyryp, «Salamatty Qazaqstan» baǵdarlamasynyń aıasynda jyl saıyn temirjol stansasy mańynyń turǵyndaryna «Densaýlyq» poıyzynyń mamandarynan bilikti medıtsınalyq kómek alýǵa múmkindik jasaıdy.
