«Densaýlyq» poıyzy Aral aýdanynyń turǵyndaryna qyzmet kórsetýde
QYZYLORDA. QazAqparat-Aral aýdanyna mamandandyrylǵan «Densaýlyq» poızy kelip jetti. Bul týraly QazAqparat tilshisi oblystyq TJD silteme jasap habarlady.
Poıyz quramyndaǵy 10 dáriger, 16 medbıke men 53 qyzmet kórsetýshi mamanǵa bas dáriger Seıilhan Artyqbaev jetekshilik etýde.
«Densaýlyq» poıyzy Sekseýil kentiniń 958 turǵynyna, onyń ishinde 166 balaǵa sapaly medıtsınalyq kómek kórsetip úlgerdi. Al 18 maýsymnan bastap Aral aýdany Qaraqum aýyldyq okrýgi, Abaı eldi mekeniniń turǵyndaryna qyzmet kórsetýde.
«Qazaqstan temir joly - Júk tasymaly» AQ prezıdenti Oralhan Kýlakov bekitken «Densaýlyq» poıyzynyń qozǵalys kestesine sáıkes, jyljymaly quram 30 maýsymǵa deıin Aral aýdanyndaǵy Sapaq, Shómish, Bekbaýyl eldi mekenderiniń turǵyndaryna medıtsınalyq kómek kórsetetin bolady.
