«Densaýlyq» poıyzy Almaty oblysy turǵyndaryn qabyldaýda
ASTANA. QazAqparat - Búgin «Densaýlyq» medıtsınalyq poıyzy Almaty oblysy turǵyndaryn qabyldaýdy bastady, dep habarlaıdy QazAqparat.
Dárigerler 15 qarashadan bastap Qopa beketiniń halqyn qabyldaı bastady. Keste boıynsha «Densaýlyq» medıtsınalyq poıyzy osy óńirde 35 kún bolady. Osy ýaqyt ishinde kelesi 20 temir jol beketiniń turǵyndary dárigerler kómegine júgine alady. Olar: Qopa, Dostyq, Jaıpaq, Beskól, Aqtoǵaı, Lepsi, Eginsý, Kóksý, Aınabulaq, Malaısary, Jolaman, Dala, Qosqudyq, Іle, Altynkól, Qundyzdy, Aıdarly, Tasqarasý, Shelek, Jetisý.
20 jeltoqsanǵa deıin Almaty oblysynyń eldi mekenderdiń turǵyndary tegin tekserýden ótip, aýrýyn anyqtaıdy jáne sala mamandarynan qajetti alǵashqy kómek pen kásibı keńeske qol jetkizip, qajet bolsa, ary qaraı emdelýge jaqyn jerdegi medıtsına ortalyqtaryna joldama alady. Medıtsına poıyzynyń dárigerlerine kelgende, jeke kýáligińizdi ala kelý kerek.
«Densaýlyq» medıtsınalyq poıyzynyń 8 vagonynda naýqastardy jan-jaqty tekserýge, ambýlatorııalyq ota jasaýǵa, emdeý kabınetteriniń qyzmetterin kórsetýge tolyq jaǵdaı jasalǵan jáne zerthanalar men dıagnostıka kabınetterimen jabdyqtalǵan. Medıtsına brıgadasynyń quramynda kelesi mamandyqtar boıynsha birinshi jáne joǵary sanattaǵy dárigerleri bar: terapevt, pedıatr, nevropatolog, okýlıst, LOR, gınekolog, hırýrg, ýrolog, tis dárigeri.
