«Densaýlyq» poıyzy 60 myńǵa jýyq adamǵa qyzmet kórsetpek
NUR-SULTAN. QazAqparat - Búgin «Densaýlyq» medıtsınalyq poıyzy jobasy óz jumysyn bastady. Poıyz Qazaqstannyń shalǵaı beketteriniń turǵyndaryna tegin medıtsınalyq kómek kórsetedi, dep habarlaıdy QazAqparat tilshisi.
«Qazirgi kúni Qazaqstannyń shalǵaı aýdandarynyń turǵyndary sapaly, ýaqytyly jáne tegin medıtsınalyq kómekke áli de tolyǵymen qol jetkizgen joq. Osy turǵyda «Densaýlyq» jobasy turǵyndarǵa sapaly jáne jedel dıagnostıka jasaýǵa múmkindik beretin zamanaýı quraldarmen jabdyqtalǵan medıtsınalyq qyzmetti usynady. Joba aıasynda árbir adam medıtsınalyq kómek ala alady. Poıyz búgin Almaty qalasynan bastaý alyp, osy jyldyń 21 jeltoqsanyna deıin júretin bolady. Bıylǵy jyly biz baratyn oblystardyń sanyn arttyrdyq, poıyz Qazaqstannyń barlyq óńirleri boıynsha 195 beketti aralap shyǵady», - dedi «Samruk-Kazyna Trust» korporatıvtik qorynyń bas dırektory Dııas Ázbergenov baspasóz máslıhatynda.
Onyń aıtýynsha, bastaýyn Almaty oblysynan alǵan medıtsınalyq poıyz odan ári Shyǵys Qazaqstan, Pavlodar, Soltústik Qazaqstan jáne Aqmola oblystaryna baǵyt alady. Sol sııaqty Ortalyq Qazaqstan beketteriniń turǵyndaryna qyzmet kórsete otyryp, poıyz batys óńirlerge alǵan baǵyty ońtústikke jalǵasady da, Jambyl oblysynda óz baǵdaryn aıaqtaıdy.
«Jalpy jol júrip ótý qashyqtyǵy 19 myńnan astam shaqyrymdy quraıdy jáne poıyz kestesi medpoezd.kz jáne sk-trust.kz saıttarynda qoljetimdi.
Medıtsınalyq brıgadalardyń quramynda qajetti mamandardyń bári bar, onyń ishinde terapevt, tis dárigeri, okýlıst, mammolog jáne basqa. Jalpy joba barysynda 10 medıtsınalyq brıgada kezekpen jumys isteıdi», - deıdi ol.
Qor deregine súıensek, ótken jyly medıtsınalyq poıyz Qazaqstan boıynsha 124 beketti aralap, 42 myńnan astam (42 306) adamǵa qyzmet kórsetti.
