«Densaýlyq» poıyzy 50 myńnan astam turǵynǵa kómek kórsetti
NUR-SULTAN. QazAqparat - «Densaýlyq» medıtsınalyq poıyzy Qyzylorda oblysynyń 12 stansasynda jergilikti turǵyndarǵa tegin medıtsınalyq kómek kórsetti, dep habarlaıdy QazAqparat.
Poıyz dárigerleri birqatar kúrdeli aýrýlardy anyqtap, odan ári emdelý men tekserilýge joldamalar berdi. Qazirgi ýaqytta medıtsınalyq poıyz Túrkistan oblysynda jumysyn jalǵastyryp jatyr.
«Dárigerler Qazaqstannyń ár aımaǵynda ekologııaǵa jáne aımaqtyq erekshelikterge baılanysty spetsıfıkalyq problemaly jaǵdaılardy anyqtap jatyr. Balalar men eresekterdiń arasynda anyqtalǵan aýrýlar san jaǵynan da aýrý dárejesiniń kúrdelilik deńgeıi jaǵynan da ósip jatyr.
Jıi kezdesken aýrýlar qatarynda: qant dıabeti, gıpertenzııa, revmatoıdty artrıt jáne onkologtyń qabyldaýynda patsıentterdiń barlyǵynda derlik mastopatııa belgileri anyqtaldy», delingen habarlamada.
Qyzylorda oblysyndaǵy medıtsınalyq tekserýlerdiń statıstıkasy kelesideı: dárigerler barlyǵy 10 393 naýqasty qabyldaǵan, onyń ishinde 554-i bala.
Medıtsınalyq poıyz kishigirim hırýrgııalyq operatsııalar men skrınıngter jasaý úshin qajetti quraldarmen jabdyqtalǵan. Osylaısha, poıyzda 312 shaǵyn hırýrgııalyq ota jasaldy, 610 EKG protsedýrasy, 617 ÝDZ jáne 199 flıýorografııa jasaldy.
Qyzylorda oblysynda turǵyndar eń kóp qaralǵan dárigerler: oftalmolog – 805 adam qabyldady, stomatolog 705 turǵyndy tekserdi,. Sondaı-aq, 610 adam kardıologtyń, 705 turǵyn LOR dárigerdiń jáne 668 turǵyn ýrolog dárigerdiń qabyldaýynda bolǵan.
«Úzdiksiz qaıtalanatyn epılepsııa aýrýy bar bir bala «Aqsaı» respýblıkalyq balalar aýrýhanasyna jatqyzyldy. Eń kóp taralǵan patologııa - temir tapshylyǵy anemııasy, balalardyń 80% -da karıes bar, balalarda ǵana emes, eresekter de kezdesedi»,- deıdi Tatıana Imambaeva, pedıatr, medıtsına ǵylymdarynyń doktory, Qazaq ulttyq medıtsınalyq ýnıversıtetiniń balalar aýrýlary kafedrasynyń professory.
Medıtsınalyq poıyz mamandardyń keń spektrimen jumys isteıtin klınıkalary joq eldiń shalǵaı aýdandarynda tegin medıtsınalyq kómek kórsetedi. Turǵyndar poıyz dárigerlerine emdelýge, tekserýden ótip, densaýlyqty saqtaý boıynsha keńesteri úshin shynaıy rızashylyqtaryn bildirip jatyr. Kóptegen patsıentter aqysyz jáne sapaly medıtsınalyq kómek alý úshin medıtsınalyq poıyzdy asyǵa kútetinderin aıtady.
«Densaýlyq» poıyzy bizdiń Bekbaýyl beketine keldi. Men barlyq dárigerlerdiń qabyldaýynda boldym. Dárigerlerdiń qabyldaýy men tekserýi óte joǵary deńgeıde. Qysqasha aıtqanda, men dárigerlerdiń kómegine óte rızamyn. Olarǵa aldaǵy jumystarynda tabys tilegim keledi»,- deıdi Bekbaýyl beketiniń turǵyny Toǵjan Júsipova.
Esterińizge sala ketsek, joba 29 sáýirden bastap júzege asyrylyp keledi jáne onyń basty maqsaty elimizdiń shalǵaı aýdan turǵyndaryn tegin medıtsınalyq qyzmetpen qamtý. Jobany «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qory QR Densaýlyq saqtaý mınıstrliginiń at salysýymen júzege asyryp jatyr.
2019 jyldyń 20 tamyzynda «Járdem» mamandandyrylǵan medıtsınalyq poıyzy iske qosylǵan bolatyn. Ol «Densaýlyq» poıyzy sııaqty medıtsınalyq kómekke qoly jetpeıtin shalǵaıdaǵy stansalar men jaqyn ornalasqan aýyldardyń turǵyndaryna alǵashqy medıtsınalyq-sanıtarlyq jáne konsýltatıvtik-dıagnostıkalyq kómek kórsetedi. Eki poıyzda barlyǵy 50 myńnan astam adam tekserildi.
Poıyz vagondary nemis jáne japon óndirisiniń aldyńǵy qatarly fırmalarynyń zamanaýı dıagnostıkalyq qural-jabdyqtarymen jabdyqtalǵan. Apparatýralar patsıentterge qajet bolǵan jaǵdaıda tolyq jalpy jáne bıohımııalyq taldaýlar jasaýǵa, rengenografııa jáne flıýorografııadan ótýge, ishki organdarǵa jáne qan tamyrlaryna ÝDZ-zertteýler júrgizýge, elektrokardıogramma, gastrofıbroskopııa jasaýǵa jáne basqa da dıagnostıkalyq zertteýler júrgizýge múmkindik beredi.
Poıyz kestesimen www.medpoezd.kz jáne www.sk-trust.kz/ru saıttarynda tanysa alasyzdar.
