"Densaýlyq" poıyzdary kelesi kezekti saparǵa ázirlenýde

ASTANA. 15 aqpan. QazAqparat -  3 medıtsınalyq poıyz 2012 jyldyń basynan 8 myń qazaqstandyqqa qyzmet kórsetti. Medıtsınalyq kómek pen dárigerdiń keńesine zárý jandar sany kúnnen kúnge kóbeıýde. Bul týraly «Qazaq temir joly» UK» AQ baspasóz qyzmeti habarlady.

26 jumys kúni ishinde (16 qańtardan 13 aqpanǵa deıin) Qaraǵandy oblysynda qatynaǵan «Salamatty Qazaqstan» poıyzy 3 939 adam qabyldady jáne olardyń árqaısysy orta eseppen 4 dárigerdiń qabyldaýynda bolǵan. Dárigerler 7 myńnan astam medıtsınalyq jáne laboratorııalyq zertteý júrgizip, tis dárigerleri 878 adamdy emdedi.

 «Salamatty Qazaqstan» shalǵaıdaǵy 19 stansa men razezdi aralap, qazir Qaraǵandy stansasynda tur.

«Densaýlyq» poıyzy Almaty oblysynda 20 qańtar men 12 aqpan arasynda saparda bolyp, 11 stansany aralap úlgerdi. Dárigerler brıgadasyna 2 599 adam qaraldy. Árbir turǵynnyń orta eseppen 11 mamannyń qabyldaýynda bolǵandyǵy  - aımaq halqynyń medıtsınalyq kómekke qanshalyqty zárý bolyp otyrǵandyǵynyń dáleli. Dárigerler 5 myńnan astam medıtsınalyq jáne laboratorııalyq zertteý júrgizdi.

17 jumys kúniniń ishinde «Járdem» poıyzy Batys Qazaqstan oblysynyń 8 stansa men razezderine qyzmet kórsetken. 1854 adam poıyz emhanasyna kelip, birneshe dárigerge qatar qaralǵandardyń sany 1854 adamdy qurady. Árbir emdelýshi orta eseppen 3 dárigerdiń qabyldaýynda boldy. Qazirgi kezde «Járdem» Aqtóbe stansasynda.

Tájirıbe kórsetkendeı, halyq kóbine-kóp dáriger-terapevtterdiń qabyldaýyna kóp jazylady. Mamandardyń arasynda kardıolog, júıke aýrýyn emdeıtin dáriger, bala dárigeri erekshe suranysqa ıe. Eń tanymal zertteý - ýltradybystyq.  

 - Stansa men razezd turǵyndarynda kóp baıqalǵan aýrýlardyń birshamasy júrek-tamyr júıesi aýrýlary, - deıdi «QTJ»UK» AQ áleýmettik jumys jónindegi Basqarmanyń bas menedjeri Ulbolsyn Ǵalymova. Onyń aıtýynsha, mamandar tynys alý men as qorytý sııaqty ishki organdardyń aýrýlaryn, sondaı-aq týbýrkýlezdi alǵashqy satysynda anyqtaıdy.

2011 jyly úsh medıtsınalyq poıyz 342 kún jumys jasap, 156 stansany aralaǵan. Statsıonarlyq emhanaǵa qoly jete almaı júrgen shalǵaı stansa men razezderdiń 75 myńnan astam el azamaty dárigerlerdiń kómegine júgingen.   302 067 adam birneshe dárigerge qatar qaralǵan, ıaǵnı árbir azamat 4 mamannyń qabyldaýynda boldy.

 Aýsymyna 200 adam qabyldaý jospary bolǵanymen, «Densaýlyq» poıyzynyń is júzinde jumys mólsheri odan 3 ese kóp boldy.

«Jyljymaly emhana» aralaıtyn aımaq halqy poıyzdyń qajettiligi men medıtsınalyq kómek mańyzdylyǵyn óz attarynan «QTJ» UK» AQ prezıdenti Asqar Mamınge joldaǵan alǵys hattarynda atap ótýde.

Búgingi tańda barlyq poıyz qatynaýdy toqtatyp, kelesi marshrýttyń bastalýyn kútip jatyr.