Densaýlyq poıyzdary 40 myńǵa jýyq adamǵa medıtsınalyq kómek kórsetpek
NUR-SULTAN. QazAqparat - Búgin «Densaýlyq» medıtsınalyq poıyzy jolǵa shyqty. Qazaqstannyń shalǵaı jatqan temirjol stansalaryna aıaldaıtyn poıyzdyń sapary bıylǵy jyldyń 21 jeltoqsanynda aıaqtalady. 240 kún ishinde temirjol boıynda ornalasqan aýyldardyń turǵyndaryna shamamen 230 mln teńgeniń qyzmeti kórsetilmek. Bul týraly «Áleýmettik medıtsınalyq saqtandyrý qory» baspasóz qyzmeti habarlady.
Atap aıtar jaıt, medıtsınalyq poıyzdar negizinde kórsetiletin qyzmetter «Áleýmettik medıtsınalyq saqtandyrý qory» kommertsııalyq emes aktsıonerlik qoǵamy tarapynan qarjylandyrylady. Dástúrli jobany «Qazaqstan temirjoly» UK» AQ men «Samruk-Kazyna Trust» áleýmettik jobalardy damytý qory birlesip júzege asyrady. Sonymen qatar, «Densaýlyq» poıyzy Atyraý, Mańǵystaý, Qyzylorda, Túrkistan, Almaty, Batys Qazaqstan, Qaraǵandy, Soltústik Qazaqstan oblystary aýmaǵyndaǵy 195 stansaǵa aıaldaıdy. Sapar barysynda barlyǵy 40 myńǵa jýyq adamǵa medıtsınalyq kómek kórsetý josparlanyp otyr.
Sońǵy úlgidegi qondyrǵylarmen jabdyqtalǵan poıyzdarda kórsetiletin medıtsınalyq kómek tiziminde: salalyq mamandardyń keńesi (terapevt, pedıatr, nevropatolog, okýlıst, LOR, gınekolog, hırýrg, ýrolog, mammolog, onkolog t.b.), túrli zertteýler men dıagnostıka túrleri (ÝDZ, qan taldaýlary, flıýorografııa t.b.), kishigirim hırýrgııalyq operatsııalar men stomatologııalyq qyzmetter jáne taǵy basqalary bar.
«Toqtala ketetin jaıt, bıyl densaýlyq salasy qyzmetkerlerimen birge Medıtsınalyq saqtandyrý qory qyzmetkerleri de jolǵa shyqpaq. Ondaǵy maqsat - stansalar turǵyndaryna mindetti áleýmettik medıtsınalyq saqtandyrý júıesi jaıly jan-jaqty málimet berý. Sebebi, bul Qazaqstandaǵy árbir turǵynǵa qatysy bar, mańyzdy reforma. Sondyqtan da Qor azamattardyń saqtandyrýǵa qatysty suraqtaryna jaýap beretin núkteler sanyn arttyryp, konsýltatsııalardy jetildire túsýge den qoıyp otyr", delingen baspasóz baıanynda.
Konsýltatsııalar barysynda shalǵaı eldi mekenderdiń turǵyndary MÁMS júıesiniń artyqshylyqtary, kepildendirilgen tegin medıtsınalyq kómek jáne mindetti áleýmettik mnedıtsınalyq saqandyrý paketteri sheńberinde kórsetiletin qyzmetter, saqtandyrý jarnasynyń mólsheri, Biryńǵaı jıyntyq tólemdi tóleý tártibi, memleket tarapynan saqtandyrylatyn sanattar jaıly tolyq málimet ala alady.
Poıyzdyń kestesi fms.kz saıtynda jarııalanǵan.
Esterińizge sala ketsek, Medıtsınalyq saqtandyrý qory memlekettik tapsyrys boıynsha kórsetiletin kepildendirilgen tegin medıtsınalyq kómek paketiniń jáne jumys berýshiler, azamattar men memleket jarnasy esebinen qarjylandyrylatyn MÁMS paketiniń operatory bolyp tabylady. Tegin medıtsınalyq kómek paketin qarjylandyrý mindeti 2018 jyldan bastap Qorǵa júktelgen bolatyn. Al, mindetti saqtandyrý sheńberinde qyzmet kórsetý 2020 jyldan bastalady.
