Densaýlyq: Óńirlerde MJÁ arqyly salynǵan nysandar sany artýda
ASTANA. QazAqparat - Ambýlatorııalyq-emhanalyq nysandaryn salý «baǵdarlamalyq memlekettik-jekeshelik áriptestik» aıasynda iske asyrylady. Bul týraly búgin Úkimet otyrysynda memlekettik-jekeshelik áriptestikti damytý týraly baıandaǵan QR Densaýlyq saqtaý mınıstri Eljan Birjanov aıtty, dep habarlaıdy QazAqparat tilshisi.
«2016-2018 jyldary óńirlerde memlekettik-jekeshelik áriptestik sharttaryn jasaýdyń oń dınamıkasy baıqalýda. Aǵymdaǵy jyldyń sońyna deıin taǵy 7 memlekettik-jekeshelik áriptestik shartyn jasaý josparlanýda. Jasalǵan 68 memlekettik-jekeshelik áriptestik sharttyń aıasynda 44 memlekettik-jekeshelik áriptestik nysany paıdalanýǵa berildi», - dedi mınıstr.
Onyń dereginshe, paıdalanýǵa berilgen nysandardyń aıasynda 6 birlik magnıttik-rezonanstyq tomograf, 5 birlik kompıýterlik tomograf, 5 birlik rentgendik-dıagnostıkalyq apparat ornatylǵan. Sondaı-aq, 11 dárigerlik ambýlatorııa, 8 zerthana, alty-altydan gemodıalız jáne oftalmalogııalyq ortalyq, úsh-úshten qalalyq emhana jáne ońaltý ortalyǵy jáne 1 jedel járdem stansasy ashyldy. 1003 jumys orny quryldy.
«Medıtsınalyq-sanıtarlyq alǵashqy kómek jelisin damytý boıynsha tásilder Qazaqstan Respýblıkasy Úkimetiniń otyrysynda maquldandy. Ambýlatorııalyq-emhanalyq nysandaryn salý «baǵdarlamalyq memlekettik-jekeshelik áriptestik» aıasynda iske asyrylatyn bolady. Statsıonarlyq sektor deńgeıinde halyqaralyq qarjy uıymdarymen) birlesip, memlekettik-jekeshelik áriptestiktiń ınfraqurylymdyq modeliniń úzdik halyqaralyq praktıkasyn qoldaný usynylady»,- dedi ol.
E.Birtanovtyń sózine qaraǵanda, densaýlyq saqtaý uıymdaryn «baǵdarlamalyq memlekettik-jekeshelik áriptestik» aıasynda medıtsınalyq qurylǵymen jaraqtandyrý Qazaqstan Respýblıkasynyń onkologııalyq aýrýlarǵa qarsy kúres jónindegi 2018 - 2022 jyldarǵa arnalǵan keshendi jospary aýqymynda pysyqtalýda.
Aıta keteıik, qazirgi kezde densaýlyq saqtaý salasynda memlekettik-jekeshelik áriptestik jobalarynyń tizbesi 3 respýblıkalyq jáne 258 jergilikti mańyzdy jobadan turady. Onyń ishinde 68 joba boıynsha shart jasalyp, 193 joba daıyndalýda. Jobalar dárigerlik ambýlatorııalardy, feldsherlik-akýsherlik jáne medıtsınalyq pýnktterdi, emhanalardy, statsıonarlardy salýdy jáne ony paıdalanýǵa berýdi, medıtsınalyq tehnıkamen jaraqtandyrýdy kózdeıdi.
