Densaýlyq mınıstrliginiń WhatsApp-ta koronavırýs chat-boty ashyldy

NUR-SULTAN. QazAqparat – Koronavırýs boıynsha halyqty aqparattandyrý úshin QR Densaýlyq saqtaý mınıstrliginiń Tsıfrlandyrý keńsesi WhatsApp-ta resmı chat-botty iske qosty. Bul týraly QR Densaýlyq saqtaý vıtse mınıstri Oljas Ábishov óziniń jelidegi paraqshasynda jarııalady, dep habarlaıdy QazAqparat.

Búgin QR Densaýlyq saqtaý mınıstrliginiń Tsıfrlandyrý keńsesi koronavırýs (COVID-19) jaıly halyqty aqparattandyrý úshin WhatsApp jelisinde resmı chat-botty iske qosty. Koronavırýs týraly ózekti ári shynaıy aqparat usynatyn qyzmettiń bul túri tegin.

Densaýlyq saqtaý mınıstrliginiń WhatsApp-taǵy resmı arnasy arqyly el turǵyndary aptasyna 7 kún táýligine 24 saǵat koronovırýs jaıly jıi qoıylatyn suraqtarǵa jaýap ala alady.

Qazaqstan Respýblıkasy Densaýlyq saqtaý mınıstrliginiń WhatsApp chat-botyn qoldaný úshin:
1) [phone] nómirin telefonyńyzǵa saqtańyz nemese https://wa.me/77058126967 siltemesine ótińiz;
2) aqparat alý úshin WhatsApp-ta atalǵan nómirge kez-kelgen mátindi habarlama jiberińiz;
Sonymen qatar resmı nómir QR Densaýlyq saqtaý mınıstrliginiń saıtynda www.dsm.gov.kz jarııalanady.

WhatsApp-tyń bas operatsııalyq dırektory Mett Idemanyń aıtýynsha, osy qıyn kúnderde adamdar jaqyndarymen, dostarymen baılanysyp, qoldaý kórsetý úshin WhatsApp-ty ádettegiden kóbirek qoldanýda: «Biz Qazaqstannyń Densaýlyq saqtaý mınıstrligine baılanystyń jańa tásilin usyna alǵanymyzǵa qýanyshtymyz. Jańa júıe azamattardyń saýaldaryna tez jaýap berip, jalpyǵa ortaq qaýipsizdikti qamtamasyz etýge múmkindik beredi».

Resmı chat-bot WhatsApp Business API-diń resmı servıs-provaıderi Infobip kompanııasymen birlesip daıyndaldy. Infobip baılanys platformasyn usyndy, al kompanııa qyzmetkerleri qysqa merzim ishinde chat-botty ázirlep, iske qosýǵa qoldaý kórsetti.

Iskander Qalybekov, Infobip kompanııasynyń Ortalyq Azııadaǵy aımaqtyq dırektory: «Búginde jaýapkershiligi bar kez-kelgen bıznes qolda bar múmkindik pen ınnovatsııany COVID-19 pandemııasyna qarsy qoldaný týraly oılaný kerek. Qoldanýshylarǵa yńǵaıly arnalar arqyly aqparatqa qoljetimdilikti uıymdastyrý mekemeler úshin negizgi qajettiliktiń biri. Aǵymdaǵy jaǵdaıda ortaq qaýipsizdikti qamtamasyz etý mańyzdy mindetke aınalyp otyr».

Álemniń birqatar densaýlyq saqtaý mınıstrlikteri halyqty koronavırýs týraly aqparattandyrý úshin WhatsApp arnasyn qoldanady. Dúnıejúzilik Densaýlyq saqtaý Uıymy, Sıngapýr úkimeti, Izraıl men Ońtústik Afrıkanyń Densaýlyq saqtaý mınıstrlikteri, Indonezııanyń aqparat jáne kommýnıkatsııalar mınıstrligi sonyń qatarynda.