12:59, 18 Qańtar 2018 | GMT +5
Densaýlyq mınıstrligi tumaýdan qaıtys bolý oqıǵalaryn joqqa shyǵardy
ASTANA. QazAqparat - Ústimizdegi maýsymda Qazaqstanda tumaý men juqpaly respıratorly-vırýsty ınfektsııadan (JRVI) kóz jumý oqıǵalary tirkelgen joq. Bul týraly Densaýlyq saqtaý mınıstrliginen málim etti, dep habarlaıdy QazAqparat tilshisi.

«Tumaý men JRVI-den kóz jumý oqıǵalary tirkelgen joq", - delingen QazAqparat agenttiginiń resmı saýalyna berilgen jaýapta.
Mınıstrlik keltirgen derekterge sáıkes, 2017 jyldyń qazan aıynan bastap, JRVI-men aýyrýdyń 224 myń oqıǵasy tirkelgen. Onyń 67,4%-in 14 jasqa deıingi balalar quraıdy.
Tumaýmen 55 qazaqstandyq aýyrǵan, onyń 21-i - balalar. Boljamdarǵa súıensek, aýrý qaýpi aqpan-naýryz aılarynda kúsheıedi. Elde tumaýdyń A jáne V vırýstary taraǵan. Sonymen birge, mınıstrlik 2 mıllıonnan astam adamnyń tumaýǵa qarsy ekpe saldyrǵanyn atap ótti. Onyń 30% - balalar bolsa, 70% - eresekter. Vaktsınadan keıin esh asqynýlar bolǵan joq.
Eske sala ketsek, «Habar» telearnasy JRVI asqynýynan elimizde 5 adamnyń kóz jumǵanyn habarlaǵan edi.