Densaýlyq mınıstrligi mektep oqýshylary arasynda aýrý túrleriniń taralýyna alańdaýly

Bul týraly búgin Májilistiń Áleýmettik-mádenı damý komıtetiniń keńeıtilgen otyrysynda Densaýlyq saqtaý vıtse-mınıstri Bolat Tókejanov málim etti. Eske salsaq, komıtet tóraıymy Darıǵa Nazarbaevanyń jetekshiligimen ótken otyrysta elimizdegi mektep oqýshylaryn buqaralyq sportqa tárbıeleý máseleleri qaralǵan bolatyn.

Vıtse-mınıstrdiń aıtýynsha, ótken jyly vedomstvo tarapynan mektep oqýshylary arasyndaǵy aýrýlarǵa taldaý jasalǵan.

«Nátıjesinde árbir úshinshi oqýshynyń kóz aýrýlaryna shaldyqqany, árbir altynshy oqýshynyń júıke júıesi aýrýlaryna beıimdigi, al árbir jetinshi oqýshy omyrtqa aýrýlaryna dýshar ekeni belgili boldy. Tis qurtynyń mektep jasyndaǵy oqýshylar arasynda taralýy 90 paıyzǵa artsa, parodontıt 70 paıyzǵa jetken. Budan bólek, mektep oqýshylary arasynda anemııa men tynys alý organynyń aýrýlary keńinen taraǵan», - deıdi Densaýlyq saqtaý vıtse-mınıstri Bolat Tókejanov.

Onyń aıtýyna qaraǵanda, mundaı jaǵdaıdyń oryn alýyna basty sebep - mektepterdegi dene shynyqtyrý sabaqtarynyń jetkiliksizdiginen, sport ortalyqtary men shynyǵý zaldarynyń qoljetimsizdiginen, sondaı-aq mekteptegi sport alańdarynyń jetkilikti túrde jaraqtalmaǵandyǵynan oryn alyp otyr. Budan bólek, densaýlyq saqtaý mınıstrligi mektepterdegi medıtsınalyq beketterdiń sapasyn arttyrýdyń qajettigin de alǵa tartady. Al mundaı medpýnktter negizinen Densaýlyq saqtaý mınıstrligine emes, Bilim jáne ǵylym mınıstrliginiń qaramaǵynda eken.

«Qazirgi tańda jalpy orta bilim beretin mektepterdegi shtatta bir ǵana medıtsına qyzmetkeri bar. Ol oqýshylarǵa qajetti ımmýndyq aldyn alý sharalaryn da, hımııaterapııany da, tereńdetilgen medıtsınalyq tekserýdi de júrgize almaıdy. Sonymen qatar, bizdi medıtsınalyq pýnktteri bar mektepter sanynyń tym azdyǵy da alańdatady. Olar 6256 nemese barlyq mekteptiń 85,8 paıyzyn ǵana quraıdy. Sondyqtan da mektepterdegi balalar densaýlyǵynyń jaǵdaıy alańdatarlyqtaı», - deıdi vıtse-mınıstr.