Densaýlyq mınıstrligi maıdyń quramynda qaýipti zattyń bar ekenin eskertti
QR Densaýlyq saqtaý mınıstrligi taratqan aqparatqa sáıkes, bıyldan bastap maı ónimderine qatysty jańa normalar kúshine endi.
«Endi margarınder, ósimdik-sary maı jáne ósimdik-maı spredteriniń, qorytylǵan ósimdik-sary maı jáne arnaıy maqsattaǵy maılar, onyń ishinde aspazdyq, kondıterlik, nan pisirý, sút maıyn almastyrǵyshtar jáne quramynda transmaılar bar basqa da ónimderdiń qaptamasynda qanyqqan maı qyshqyldary men maı qyshqyldary transızomerleri týraly qosymsha aqparat berilýi tıis (ónimdegi maı quramynyń paıyzymen)», - delingen QR DSM Qoǵamdyq densaýlyqty saqtaý komıtetiniń resmı habarlamasynda.
Tehnıkalyq reglament boıynsha atalǵan zattyń mólsheri maıdyń jalpy quramynan 2 protsentten aspaýy tıis.
Dúnıejúzilik densaýlyq saqtaý uıymy transmaılardy tutyný júrek-qan tamyry aýrýlaryna, abdomınaldy semizdikke, dıabetke, Altsgeımer aýrýyna, ókpe obyryna, reprodýktıvtik fýnktsııalardyń buzylýyna, ót-tas aýrýlaryna alyp keletinin eskertedi. Transmaılar qaıta óńdelgen tamaq ónimderinde, margarınder jáne býterbrod qospalarynda, qýyrylǵan taǵamda, fastfýd jáne pisirilgen nanda, sondaı-aq pıtstsalar, chıpsiler, pecheneler, frı kartoby, taýyq etinen nagetster jáne basqa da ónimderde bolady.
Búginde kóptegen elderde transmaılardy paıdalanýǵa tyıym salynǵan. Máselen, Shveıtsarııa, Avstrııa, Islandııa, Vengrııa, Norvegııa, Shvetsııa, Danııada ónerkásiptik transmaılar quramynyń joǵarǵy shegin 100 gramm maıǵa 2 gramm, ıaǵnı jıyntyq maıdyń 2 protsenti deńgeıinde belgilengen. Bıyldan bastap ondaı kórsetkish Qazaqstanda, sondaı-aq Eýrazııalyq ekonomıkalyq odaqqa múshe memleketterde de belgilendi.
«2018 jyldyń 1 qańtarynan keıin daıyndalǵan, tańbalaýynda maı qyshqyldary transızomerleriniń quramy týraly aqparaty joq nemese olardyń úlesi belgilengen normatıvten (2 paıyzdan) asatyn ónimdi satyp alǵan jaǵdaıda tutynýshy Qoǵamdyq densaýlyq saqtaý komıtetiniń aýmaqtyq organyna júgine alady. Tehnıkalyq reglamentter talaptaryn buzǵany, sonyń ishinde sáıkes kelmeıtin ónimdi shyǵarǵany úshin kásipkerlik sýbektilerine 40-tan 200-ge deıin aılyq eseptik kórsetkish kóleminde aıyppul salý kózdelgen», - delingen komıtettiń resmı habarlamasynda.