Densaýlyq mınıstrligi qatań karantınge taǵy da oralý boljamy týraly aıtty

NUR-SULTAN. QazAqparat – Qazaqstan kúzde qatań karantın sharalaryna oralýy múmkin be? Bul saýalǵa QR Densaýlyq saqtaý mınıstrliginiń resmı ókili Baǵdat Qojahmetov jaýap berdi, dep habarlaıdy QazAqparat tilshisi.

«Qalaı degenmen qazirgi ýaqytta Densaýlyq saqtaý mınıstrligi de, Úkimet te belgili bir teris boljamǵa baǵdar jasap otyr. Ol qysqa merzimdi, uzaq merzimdi bolady. Uzaqmerzimdi boljamdy qatelikke boıaldyrý deńgeıi óte joǵary. Sondyqtan Densaýlyq saqtaý mınıstrligi qysqa merzimdi aptalyq, 15 kúndik nemese 10 kúndik boljamǵa arqa súıeıdi», - dedi ol Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, 15 tamyzda karantın sharalaryn jeńildetý jaǵdaıy boldy. Odan keıin tamyz aıynyń sońynda taǵy da karantın sharalary bosańsytylyp, bıznesmender men kásiporyndar jumysyna orala bastady.

«Karantın sharalarynyń qandaı bolatyndyǵy, onyń kúsheıtiletindigi ne bolmasa jeńildetiletindigi bizdiń qoǵamnyń tártibine, júris-turys ádebine tikeleı baılanysty ekendigin atap ótkim keledi. Biz sanıtar dárigerdiń talaptaryn múltiksiz oryndap, birinshi kezekte maska taǵýymyz, áleýmettik araqashyq saqtaýymyz, jabyq ǵımarattyń ishinde kóptep jınalmaýymyz kerek. Tártipke qalaı baǵynatyndyǵymyzǵa baılanysty karantın sharalary qatańdatylyp ne bolmasa múldem alynyp tastalýy múmkin», - dedi Baǵdat Qojahmetov.