Densaýlyq mınıstrligi Qaraǵandyda ýlanǵan balalar týraly: klınıkalyq belgiler tamaqtan ýlanýǵa tán emes

ASTANA. QazAqparat - Densaýlyq saqtaý mınıstri Ajar Ǵınııat Qaraǵandy oblysynyń ákimimen jáne QR DSM jetekshi mamandar tobymen Arnaýly áleýmettik qyzmetter kórsetý ortalyǵynyń toǵyz tárbıelenýshi balasy ýlanyp túsken oblystyq klınıkalyq aýrýhananyń Infektsııalyq ortalyǵyna bardy.

Bul týraly QazAqparat QR Densaýlyq saqtaý mınıstrliginiń baspasóz qyzmetine silteme jasap habarlaıdy.

Baspasóz qyzmetiniń málimetterine qaraǵanda, A. Ǵınııat jaǵdaıy aýyr tórt patsıent jatqan qarqyndy reanımatsııa bólimshesinde boldy. Olardyń barlyǵy ókpeni jasandy jeldetý (ÓJJ) apparatyna qosylǵan. Osy klınıkada 10-15 jas aralyǵyndaǵy taǵy bes bala neıroboksırlengen bólimshege jatqyzyldy, olardyń jaǵdaıy ortasha aýyrlyq dárejesinde dep baǵalanyp otyr.

Odan ári vedomstvo basshysy reanımatsııa bólimshesinde medıtsınalyq-áleýmettik mekemeden túsken taǵy eki patsıent jatqan qalalyq balalar aýrýhanasyna bardy.

Mınıstr óńirdiń densaýlyq saqtaý basqarmasynyń basshylarymen birlesip medıtsınalyq kómek kórsetý jaǵdaılaryn qarap, emdeý protsesin jáne balalar aýrýynyń sebepterin anyqtaý boıynsha zertteýler júrgizýdi baqylaýǵa aldy.

Mamandardyń aıtýynsha, anyqtalǵan sanıtarııalyq-gıgıenalyq buzýshylyqtar balalardyń jekelegen tobynyń jiti ishek ınfektsııalaryn (JІI) týdyrýy múmkin emes. Patsıentterdegi klınıkalyq belgiler tamaqtan ýlanýǵa tán emes, munda qaıta-qaıta qusý, ishtiń jıi ótýi, keıde qan aralas ishtiń ótýi, sýsyzdaný baıqalady.

JІI úshin epıdeprotsess kórinisteriniń tán spektri joq: qysqa ýaqyt ishinde jaǵdaılardyń jappaı tirkelýi, barlyq jastaǵy adamdardyń, ásirese jas balalar men barynsha álsiregen balalardyń ınfektsııaǵa beıimdiligi, portsııanyń kólemine jáne juqtyrǵan agenttiń alynǵan dozasyna qaraı bir ónimdi tutynýmen baılanysy.

Densaýlyq saqtaý mınıstrliginiń basshysy Qaraǵandyda ótken brıfıngte jýrnalısterdiń zardap shekken balalardyń jaǵdaıy, patsıentterge medıtsınalyq kómek kórsetý barysy týraly suraqtaryna jaýap berdi.

Búgingi tańda tergeý júrgizý úshin arnaıy komıssııa quryldy, onyń nátıjeleri boıynsha bolǵan oqıǵanyń sebebi boıynsha resmı aqparat alynady.

Balalardyń jaǵdaıy Qazaqstan Respýblıkasy Densaýlyq saqtaý mınıstrliginiń baqylaýynda. Qajetine qaraı konsılıýmdar, eldiń jetekshi beıindi klınıkalarymen telemedıtsınalyq konsýltatsııalar ótkiziletin bolady.

Qajet bolǵan jaǵdaıda balalardy respýblıkalyq uıymdarǵa aýystyrý júzege asyrylady.