Densaýlyq mınıstrligi dárihana jumysyndaǵy kemshilikter týraly aıtty

NUR-SULTAN. QazAqparat – QR DSM sanıtarlyq-epıdemıologııalyq baqylaý komıteti tóraǵasynyń orynbasary Nurlybek Asylbekov dári-dármek salasyndaǵy zań buzýshylyqtar týraly aıtty, dep habarlaıdy QazAqparat tilshisi.

«Memleket basshysynyń dári-dármek baǵasynyń negizsiz ósýine jol bermeý tapsyrmasyn oryndaý maqsatynda dárilik zattardyń baǵasyn baqylaýdy qamtamasyz etý turǵysynda oblystar men respýblıkalyq mańyzdaǵy qalalarda monıtorıngilik toptar quryldy. Olardyń quramyna bizdiń komıtettiń aýmaqtyq bólimsheleri, jergilikti atqarýshy ári quqyq qorǵaý organdary engizildi. Monıtorıngilik toptarmen 1640-tan astam dárihana qamtylyp, shekti baǵadan asyp satylǵan dárilik zattardyń 199 ataýy anyqtaldy», - dedi N. Asylbekov Ortalyq kommýnıkatsııalar qyzmetinde.

Onyń sózine qaraǵanda, bıylǵy15 shildeden 9 qarashaǵa deıin 174 mln teńge somasyna shekti baǵanyń artýynyń 876 faktisi, 39,4 mln teńge somasyna dárilik zattardy zańsyz ótkizýdiń 347 faktisi anyqtaldy. Munymen qosa, 1223 ákimshilik hattama toltyrylyp, 213 mln teńgeden astam somada aıyppul salyndy. Zańsyz aınalymnan 10 mln-nan astam dári-dármek pen medıtsınalyq zattar alyndy.

Budan buryn habarlanǵandaı, Nurlybek Asylbekov elimizdegi dárilik zattardyń qoryna qatysty túsinik berdi. Qazirgi kezde dárihanalarda halyqtyń dárilik zattarǵa qajettiligin qamtamasyz etý úshin preparattar jetkilikti.