Densaýlyq mınıstrligi COVID-19 boıynsha statıstıkalyq zertteý júrgizedi
NUR-SULTAN. QazAqparat – QR Densaýlyq saqtaý mınıstrligi Dúnıejúzilik densaýlyq saqtaý uıymymen birlesip, eldegi COVID-19 juqtyrý jaǵdaıyn anyqtaý boıynsha statıstıkalyq zertteý júrgizý jobasyn bastady. Bul týraly mınıstr Alekseı Tsoı aıtyp berdi, dep habarlaıdy QazAqparat tilshisi.
Bul tapsyrmany Memleket basshysy Qasym-Jomart Toqaev 29 qańtarda Reformalar jónindegi Joǵary keńestiń úshinshi otyrysynda bergen edi.
«COVID-19 aýyrǵandardyń shynaıy ahýalyn anyqtaý boıynsha statıstıkalyq zertteý júrgizý úshin mınıstrlik DDSU sanıtarııalyq-epıdemıologııalyq saraptama jáne monıtorıng ǵylymı-praktıkalyq ortalyǵy fılıalynyń bazasynda tıisti jobany iske asyrýda. Ári qaraı zertteý nátıjeleri negizinde statıstıkalyq derekterdi tirkeý jumystary júredi», - dedi A. Tsoı Úkimet otyrysynda.
Sonymen birge, mınıstr Prezıdent tapsyrmasy aıasynda tanymal qazaqstandyq dárigerlerdiń usynystaryn jan-jaqty talqylaý úshin mınıstrlik ókilderi men sarapshylardyń qatysýymen kezdesý ótetinin aıtty. Sodan keıin olardyń kandıdatýralary Densaýlyq saqtaý salasyndaǵy ulttyq jobalardy anyqtaý jónindegi top quramyna engiziledi.
