Densaýlyq mınıstrligi bir búıregin bergen azamattyń qaıtys bolǵanyn rastady

ASTANA. QazAqparat - Ortalyq kommýnıkatsııalar qyzmetiniń búgingi baspasóz máslıxatynda QR Densaýlyq saqtaý mınıstrliginiń shtattan tys bas transplantology Serik Jaryqov Almaty qalasynda bir búıregin berýge kelisken adamnyń qaıtys bolǵany týraly aqparatty rastady, dep xabarlaıdy QazAqparat tilshisi.

"Atalǵan donor bir adamnyń týysy bolǵan. Transplantatsııanyń ózi Almatydaǵy №7 klınıkalyq aýrýxanada jasaldy. Patsıent 28 jasta edi. Ol óz týysyna sol jaq búıregin berýge kelisken. Ota sátti jasaldy. Alaıda on eki kúnnen keıin onyń jaǵdaıy kúrt nasharlap ketti. Ókinishke qaraı, patsıent qaıtys boldy. Qazir sotqa deıingi tergeý sharalary atqarylyp jatyr. Sot-medıtsınalyq saraptamadan keıin dárigerlerdiń qyzmeti qanshalyqty durys bolǵany anyqtalady", - dep atap kórsetti Jaryqov.

Onyń aıtýynsha, Qazaqstanda translantologııa 1979 jyly qolǵa alyndy. Biraq onyń keńinen qoldanylýy 2012 jyly elimizde alǵash júrekti almastyrý otasy jasalǵannan keıin bastaldy. Búginde densaýlyq saqtaý mınıstrligi osy salany odan ári damytýǵa múddeli. Aldaǵy ýaqytta Astana, Almaty, Shymkent pen Aqtóbe qalalaryndaǵy transplantologııa ortalyqtarynan bólek, Qaraǵandy men Shyǵys Qazaqstan oblystarynda jańadan eki ortalyq ashý josparlanǵan.