Densaýlyq mınıstrligi bas dárigerlerdi qysqartyp, medbıkelerdiń jalaqysyn kótermek

ASTANA. QazAqparat - Densaýlyq saqtaý mınıstrligi medıtsınalyq mekemelerge qatysty jańa normatıvti engizýdi kózdeıdi. Sonyń aıasynda aýrýxanalardy ózara biriktirip, kópbeıindi emdeý mekemelerine aınaldyrý josparlanǵan. Mınıstr Eljan Birtanovtyń aıtýynsha, ákimshilik apparatty qysqartýdyń arqasynda bıýdjettiń biraz qarajatyn únemdeýge bolady, dep xabarlaıdy QazAqparat tilshisi.

"Máselen, stantsıonarlarǵa keletin bolsaq, Qazaqstanda emxanalarmen qamtamasyz etý kórsetkishi Ekonomıkalyq damý jáne yntymaqtastyq uıymyna kiretin memleketterden 40 protsentke artyq bolyp tur. Sebebi bizde monoprofıldi uıymdar kóp. Aýrýxanalarda jatyn oryndardyń ortasha sany 130-ǵa teń. Bul kórsetkish Dúnıejúzi bank usynǵan josparlardan tórt ese joǵary. Al álemdik tájirıbege sáıkes, jetekshi statsıonarlar kópbeıindi, ıaǵnı ol jerde medıtsınalyq qyzmetterdiń sany kóp. Osynyń arqasynda naýqasty júıeli túrde emdeýge múmkindik bar", - dedi Birtanov Úkimettiń búgingi otyrysynda.

Osyǵan baılanysty elimizde aýdandyq jáne qalalyq emxanadardyń qurylymyn ózgertý kózdelip otyr. Al xalyqtyń sany jańa normatıvtiń basty sharty bolmaq. "Aýdandyq emxanalarda jańa medıtsınalyq qyzmetter engiziledi. Al qalalarda monobeıindi statsıonarlardy kópbeıindi stantsıonarlarǵa aınaldyrý qarastyrylǵan. Bul degenimiz, balalar men úlkenderge arnalǵan emxanalarda qyzmet kórsetý túrleri artady. Kópbeıindi uıymdardyń ishinde arnaıy ortalyqtardy damytý jumysyna basymdyq beriledi", - dep atap kórsetti mınıstr.

Onyń aıtýynsha, atalǵan sharalardyń nátıjesinde medıtsınalyq qyzmettiń tıimdi júıesin qurýǵa bolady. Al jeke-dara jumys isteıtin emxanalardyń sany 360-tan 105-ke qysqarady. Bylaısha aıtqanda, emxanalar men aýrýxanalar ózara birigip jumys isteıtin bolady. Ákimshilik apparat qysqarsa da, qarapaıym medıtsınalyq qyzmetkerler óz jumysyn isteı beredi. Máselen, basqarýshy apparatty qysqartýdyń arqasynda jyl saıyn 10,7 mlrd teńgeni únemdeýge múmkindik bar.

"Ákimishlik qysqartý degenimiz, biz úsh bas dárigerdiń ornyna bir bas dáriger qoıamyz. Qazir bir bas dáriger aıyna 300-400 myń teńge alady. Oǵan qosa, orynbasarlary, býxgalterııasy jáne taǵy basqa ákimshilik shyǵystar bar. Sonyń bárin únemdeýge bolady. Árıne, únemdelgen aqshany qarapaıym meıirbıkeler men dárigerlerdiń jalaqysyna jiberýge bolady", - dedi Densaýlyq saqtaý mınıstri Eljan Birtanov QazAqparat tilshisine bergen suxbatynda.