Densaýlyq mınıstrligi Aıagózde aýyz sý sapasyna baqylaýdy kúsheıtti
Qoǵamdyq densaýlyqty saqtaý komıtetiniń tóraǵasy - Bas memlekettik sanıtarlyq dáriger Jandarbek Bekshınniń aıtýynsha, Shyǵys Qazaqstan oblysynyń eldi mekenderinde, sonyń ishinde Aıagóz qalasynda aýyz sýdyń sapasy qatań baqylaýǵa alyndy. "Sondaı-aq, Aıagózde mobıldi toptar quryldy. Olar jergilikti jerdegi sýdyń sapasyn baqylap otyrady. Qazirgi kezde sý tasqynynan zardap shekken 40 adam mektep-ınternattyń ǵımaratyna ýaqytsha kóshirildi. Sol jerde asxana, jatyn oryn jáne taǵy basqa jaǵdaılar jasaldy. Biz óz tarapymyzdan tamaqtandyrý jaǵyn baqylaýǵa aldyq. Qazirgi kezde Shyǵys Qazaqstan oblysyndaǵy eldi mekenderde sanıtarlyq-epıdemıologııalyq jaǵdaı turaqty. Adamdardyń syrqattanýy kúndelikti tártippen tirkelip jatyr", - dedi J.Bekshın Astanada jýrnalısterge bergen suxbatynda.
Bas sanıtarlyq dárigerdiń aıtýynsha, sý tasqynyna baılanysty aýyz sýdyń sapasyn tekserý sharalary jıi ótkiziledi. Ázirshe, sýdyń sapasy sanıtarlyq talaptarǵa saı keledi. "Árıne, biz sýmen qamtý júıesin ǵana emes, káriz júıelerin, daladaǵy dáretxanalar men qudyqtardy da baqylap otyramyz. Sebebi sý tasqyny kezinde bári jerdiń betine shyǵýy ábden múmkin. Ondaı jaǵdaıda aýdandyq qurylymdar ákimdiktermen birge dızenfektsııa sharalaryn júrgizedi", - dep atap kórsetti J.Bekshın.
Eske salaıyq, osy kúnderi Shyǵys Qazaqstan oblysynyń Aıagóz aýdanynda erigen qar men jańbyr saldarynan kóptegen úılerdi sý basty. Tótenshe jaǵdaı jarııalandy.
Búginde evakýatsııalanǵan 200-den astam adam úılerine qaıta oraldy. Komıssııa sý tasqynynan zardap shekken taǵy 89 úıdi anyqtady. Qaýipsiz jerge kóshirilgen adamdardyń bir bóligi mektep-ınternat bazasyndaǵy evakýatsııa beketine ornalastyryldy. Olarǵa ystyq tamaq jetkizilip, psıhologııalyq kómek kórsetilýde.
ShQO ákimi Danıal Ahmetovtyń aıtýynsha 10 naýryzdan bastalǵan tasqyn kezinde oblys boıynsha 229 úıge sý kirgen. Onyń 189-y - Aıagóz qalasynda. Óskemende - 24, Ulan aýdanynda - 5, Glýbokoe aýdanynda - 8, Zaısan aýdanynda - 2, Kúrshim aýdanynda 1 úıge sý kirgen. Sondaı-aq 193 aýla men 110 saıajaı nysany da sý qursaýynda qalǵan. Qazir barlyq eldi mekender sýdan arylǵan. Jańbyr sýynan japa shekken aýdandardyń qataryna Zyrıan, Katonqaraǵaı, Tarbaǵataı, Shemonaıha aýdandary men Rıdder qalasy da endi.
Óńir basshysy Aıagózde baspanasy qulap qalǵan 8 otbasyǵa baspana beriletinin aıtty.
Foto: windsorpureandclean.com