Densaýlyq mınıstri jergilikti MJÁ-di júzege asyrýdaǵy problemalardy atady
ASTANA. QazAqparat - Elimizdiń birqatar óńirinde aýrýhanalardy salý boıynsha iri jergilikti memlekettik-jekeshelik áriptestik jobalaryn iske asyrý qajet. Bul týraly búgin Úkimet otyrysynda memlekettik-jekeshelik áriptestikti damytý týraly baıandaǵan QR Densaýlyq saqtaý mınıstri Eljan Birjanov aıtty, dep habarlaıdy QazAqparat tilshisi.
Mınıstrdiń sózine qaraǵanda, jergilikti memlekettik-jekeshelik áriptestik jobalaryn iske asyrý boıynsha problemalyq másele bar. Qazirgi ýaqytta memlekettik-jekeshelik áriptestik jobalary boıynsha memlekettik mindettemelerdi qamtamasyz etý úshin bir óńir boıynsha úsh jyl kezeńine ekonomıkanyń barlyq sektorlaryna lımıt ortasha 58 mlrd teńge keledi. Bul rette, kóp beıindi aýrýhana qurylysy boıynsha 1 iri memlekettik-jekeshelik áriptestik jobasy úshin mindettemeler shamamen 60 mlrd teńgeni quraıdy.
«Osyǵan baılanysty, mınıstrlik mynany usynady: birinshi, memlekettik-jekeshelik áriptestik jobalary, onyń ishinde kontsessııa jobalary boıynsha memlekettik mindettemelerdiń lımıtin ulǵaıtý jáne densaýlyq saqtaý ınfraqurylymyn damytýdyń perspektıvalyq josparlaryn iske asyrý aıasynda densaýlyq saqtaý salasyna mindettemelerdiń somasyn bekitý múmkindigin qaraý; ekinshi, jergilikti memlekettik-jekeshelik áriptestik jobalary, onyń ishinde kontsessııa jobalary boıynsha memlekettik mindettemelerdi respýblıkalyq bıýdjetten qosa qarjylandyrý múmkindigin qaraý usynylady», - dedi mınıstr.
Máselen, E.Birtanovtyń aıtýynsha, Túrkistan, Soltústik Qazaqstan oblystarynda jáne Astana qalasynda aýrýhanalardy salý boıynsha iri jergilikti memlekettik-jekeshelik áriptestik jobalaryn iske asyrýdyń qajettiligi bar.
«Osyǵan baılanysty, Ulttyq ekonomıka jáne qarjy mınıstrlikterimen birlesip, atalǵan máseleni pysyqtaý usynyldy», - dedi mınıstr.
Úkimet otyrysynda Eljan Birtanov ambýlatorııalyq-emhanalyq nysandaryn salý «baǵdarlamalyq memlekettik-jekeshelik áriptestik» aıasynda iske asyrylatyndyǵyn aıtqan edi.
