Densaýlyq mınıstri Túrkistan oblysynyń emdeý mekemelerin aralap kórdi
NUR-SULTAN. QazAqparat - QR Densaýlyq saqtaý mınıstri Alekseı Tsoı Túrkistan oblysyndaǵy birqatar emdeý mekemelerin aralady, dep habarlaıdy QazAqparat.
Oblys ákimdiginiń baspasóz qyzmetinen málim etkendeı, Qazaqstannyń Bas dárigeri aldymen, Túrkistan qalasynda salynyp jatqan 630 oryndyq kópsalaly oblystyq aýrýhananyń qurylysymen tanysty. Jańa aýrýhanada ota jasaıtyn 16 bólme, 13 josparly jáne 3 jedel medıtsınalyq kómek kórsetý bólimderi qarastyrylǵan. 1500-ge jýyq medıtsına qyzmetkeri jumys isteıtin bolady. Qurylys jumystaryn 2022 jyly aıaqtaý josparlanǵan.
Sondaı-aq mınıstr oblystyq Qoǵamdyq densaýlyq basqarmasynyń basshysy Marat Pashımovpen Túrkistan qalasyndaǵy birqatar emdeý mekemelerin aralap, tynys-tirshiligimen tanysty. Qalalyq ortalyq emhanada bolyp, ondaǵy jumys barysyn baqylady. Emhana bir aýysymda 500 kelýshige laıyqtalǵan. 900-den astam medıtsına qyzmetkeri jumys isteıdi. Koronavırýs ınfektsııasymen kúres maqsatynda 18 mobıldi top qurylǵan. Emhananyń bazasynda sondaı-aq, indetti anyqtaıtyn vırýsologııalyq zerthana bar. Osy kúnge deıin 40 myńǵa jýyq azamattan synama alynǵan. Emdeý mekemesi barlyq qajetti medıtsınalyq qural-jabdyqtpen de tolyq qamtamasyz etilgen.
Jergilikti medıtsına qyzmetkerlerimen kezdesip, jaǵdaılarymen tanysqan A.Tsoı óńirdegi emdeý mekemeleriniń qyzmetine oń baǵasyn berdi.
«QR Prezıdenti halyqqa Joldaýynda alǵashqy medıtsınalyq kómekti damytýǵa asa mán berdi. Túrkistan oblysynda bul baǵytta aýqymdy jumystar atqarylýda. Túrkistan qalalyq emhana qyzmetkerleriniń koronavırýs ınfektsııasy beleń ala qalǵan jaǵdaıda ekinshi tolqynǵa daıyndyǵy joǵary deńgeıde ekendigin de baıqadyq. Emdeý mekemesi barlyq medıtsınalyq qajettiliktermen jáne jedel-járdem kólikterimen qamtamasyz etilgen», - dedi Alekseı Tsoı.
Mınıstr óz sózinde, oblysta tumaýǵa qarsy ekpe egýge daıyndyq jumystary qarqyndy júrgizilip jatqandyǵyn atap ótti. Óńirge bul maqsatta vaktsınanyń birinshi partııasy jetkizilgen. Osy aıdyń 15-nen bastap egý jumystary bastalady.
Densaýlyq saqtaý mınıstri sapar sońynda Túrkistan qalasynda jańadan boı kóterip jatqan modýldi juqpaly aýrýlar aýrýhanasynda da boldy. Emdeý mekemesi 200 tósek-orynǵa eseptelgen. Nysannyń qurylysy josparlanǵan aımaqta barlyq qajetti ınjenerlik jeliler men kólik ınfraqurylymy bar.
