Densaýlyq mınıstri: Tumaýǵa qarsy 2 mıllıonnan astam vaktsına satyp aldyq
«Qazirgi ýaqytta elde zerthanalyq zertteý (koronavırýsty anyqtaıtyn test) deńgeıi elde táýligine 40 myńǵa deıin jetkizildi. Sonymen qatar, búgingi kúni óńirlerdegi 11 veterınarlyq zerthana ashylyp, olar da 20 myńǵa tarta zertteý jasap úlgerdi. Pandemııanyń kezekti tolqynyna daıyndalý maqsatynda jyldyń sońyna deıin zerthanalyq zertteýdiń táýliktik mólsherin 63 myńǵa deıin jetkizý kózdelip otyr», - dedi Alekseı Tsoı Úkimet otyrysynda.
Mınıstrdiń aıtýynsha JRVI men tumaýdyń órshıtin ýaqyty kele jatyr.
«Osy epıdemıologııalyq kezeńde biryńǵaı dıstrıbıýtor tumaýǵa qarsy 2 mln 199 myń 990 vaktsına satyp alyp qoıdy. Bul mólsher – jalpy halyqtyń 11 paıyzyn qamtýǵa jol ashady», - degen mınıstr ekpe jumystary júrek qan tamyrlary men tynys alý joldarynda sozylmaly aýrýlary bar adamdarǵa, jıi aýyratyn balalarǵa, bilim berý uıymdaryndaǵy balalarǵa, ata-anasynyń qaraýynsyz qalǵan balalarǵa, medıtsınalyq qyzmetkerlerge salynatynyn jetkizdi.