Densaýlyq mınıstri tegin dárilerdiń urlyǵyna qatysty pikir bildirdi

ASTANA. QazAqparat - QR Densaýlyq saqtaý mınıstri Eljan Birtanov tegin dárilerdi urlaýǵa qatysty pikir bildirdi, dep habarlaıdy QazAqparat tilshisi.

«Bizdegi derekterge qaraǵanda, patsıentterdiń 20 protsenti dári-dármekti almaǵan bolyp shyqty. Alaıda jergilikti atqarýshy organdar bárine qolma-qol berdik dep otyr. Budan bólek, naýqastardyń taǵy 18 protsenti dárilerdi tolyq almaǵan. Sonda jańaǵy 20 protsenttiń ózi - barlyq respýblıkaǵa ketetin dárilerdiń eki aılyq kólemi. Demek, árbir besinshi preparat belgisiz jaqqa ketedi», - dedi E.Birtanov keńeıtilgen alqa májilisinde.

Mınıstrdiń aıtýynsha, memleket bir jaǵynan dári-dármekterdiń tapshylyǵyn sheshýge tyryssa, jergilikti jerde ol dárilerdi ashyq urlaıdy.

«Bálkim, bireýler tegin preparattardy ashyq urlaıdy da, biz bilmeıtin jaqqa jiberip otyrady. Al keıbir málimetter boıynsha ondaı dáriler jekemenshik dárixanalarǵa túsedi. Tipti, shekara asyp, kórshi elderdiń naryqtaryna ketip jatyr degen derekter bar», - dep atap kórsetti E.Birtanov.

Aıta keteıik, alqa májilisi kezinde atalǵan máseleni QR Premer-Mınıstriniń orynbasary Erbolat Dosaev ta kóterip, xalyqty dári-dármekpen qamtamasyz etý salasyndaǵy tártip buzýshylyqtardy ataǵan bolatyn.