Densaýlyq mınıstri Mańǵystaýdaǵy epıdemıologııalyq jaǵdaımen tanysty
Sapar barysynda jergilikti atqarýshy organdar men densaýlyq saqtaý mekemeleriniń koronavırýs ınfektsııasynyń ekinshi tolqynyna daıyndyq jumystarymen tanysty. Sonymen birge, densaýlyq saqtaý basqarmasynyń basshylyǵymen jáne oblys dárigerlerimen kezdesti.
«Mańǵystaý oblysynda epıdemıologııalyq ahýal sońǵy 6 kúnde turaqty, 31 qazannan bastap COVID-19 jańa jaǵdaıy tirkelgen joq. Ótken aıdaǵy epıdemıologııalyq jaǵdaıdy baǵalaý matrıtsasynda oblys «jasyl» aımaqta», - dep atap ótti A.Tsoı.
Alaıda koronavırýs ınfektsııasynyń birinshi tolqynynda jabyq toptarda ınfektsııa oshaqtary alańdaýshylyq týǵyzdy. Naýryz aıynan beri «Mańǵystaýmunaıgaz» - 64 adam, «Qarajanbasmunaı Gaz» AQ - 396 adam, «Buzachi Operating LTD» - 92 adam ınfektsııa juqtyrǵan. Osyǵan baılanysty A.Tsoı vırýstyń taralýyn baqylaýǵa alýdy jáne barlyq qajetti epıdemııaǵa qarsy sharalardy ótkizýdi tapsyrdy.
Budan keıin Densaýlyq saqtaý mınıstri 200 tósek orynǵa laıyqtalǵan jańa modýldi ınfektsııalyq aýrýhananyń jumysymen tanysty, onyń 20-sy reanımatsııalyq tósek. Nysannyń basty ereksheligi - aýa rettegishtiginde, ıaǵnı aýany tazalap otyratyn arnaıy qondyrǵylarmen qamtylǵan.
«Negizgi medıtsınalyq blokta kelip túsken naýqastardy shuǵyl tekserýge arnalǵan zerthana jáne tolyqqandy PTR zerthanasy, rentgen kabıneti, tomografııa jáne ókpeniń jaǵdaıyn baǵalaýǵa arnalǵan KT apparaty ornalasqan. KT jáne rentgen bólmelerindegi qabyrǵalar men tóbeler personal men patsıentterdi radıatsııadan qorǵaý úshin qorǵasyn plıtalarymen qaptalǵan. Sonymen qatar, aýrýhanada vırýs juqtyrmas úshin arnaıy 10 bólim qarastyrylǵan. Sonymen birge, medıtsınalyq uıymǵa kire beriste jáne shyǵý kezinde avtokólik quraldaryna, onyń ishinde jeke quram men jedel járdem mashınalaryna arnalǵan dezınfektsııalyq qurylǵylar qoıylǵan. Bul zerthanalarda qaýipsizdikti barynsha saqtaýǵa múmkindik beredi. Osylaısha, aýrýhana barlyq ınfektsııalarmen jumys isteı alady», - dedi oblystyq densaýlyq saqtaý basqarmasynyń bastyǵy Jamal Jamanbaeva.
Budan ári mınıstr dárigerlerge sanıtarlyq kólikterdiń kiltin tapsyrdy, olardyń qoljetimdiligi qazir oblysta 100%-ǵa jetip otyr. Al jyljymaly PTR zerthanasymen qamtamasyz etý joǵary deńgeıde.
«Mańǵystaý oblysynda koronavırýsty anyqtaý úshin 6 PTR testin ótkizetin zerthana bar. Búgingi kúni oblysta 105 693 PTR testi jasalǵan. Taldaý ortalyqtary kúnine 4 300 test ala alady, qazirgi ýaqytta 1300-den astam PTR synaq júrgizilýde», - dedi Densaýlyq saqtaý mınıstri (esepte kúnine 741 PTR).
Sonymen qatar, A.Tsoı onkologııalyq dıspanserdiń jańa ǵımaratynda bolyp, qurylys-montaj, baılanys jumystary qalaı júrgizilip jatqanyn kórip, palatalardy aralap, naýqastarmen áńgimelesti. Búgingi kúni dıspanserde 4 300 adam esepte tur, jyl basynan beri 550-den astam naýqas anyqtaldy. Sodan keıin mınıstr №1 Aqtaý qalalyq emhanasynyń basshylyǵymen jáne dárigerlerimen sóılesip, ózderin qyzyqtyrǵan suraqtaryn qoıdy.
Jumys saparynyń sońynda oblystyń medıtsınalyq aktıvimen kezdesý ótkizildi, onda koronavırýstyń ekinshi tolqynyna daıyndyq máseleleri kóterildi.
