Densaýlyq mınıstri qamaýǵa alynǵan qyzmetkerlerine qatysty pikir bildirdi
Birtanovtyń atap ótýinshe, iri kólemde para alǵany úshin ustalǵan Farmatsııa komıteti tóraǵasynyń mindetin atqarýshy L.Pak zeınet jasqa jetip, jumys istegen.
"Larısa Pak densaýlyq saqtaý salasynda kópten beri jumys istep keledi. Bilýimshe, memlekettik qyzmetke ol 2002 jyly kelgen bolatyn. Osy ýaqytqa deıin ol barlyq satylardan ótip, komıtet basshysy qyzmetin de atqarǵan. Byltyrdan beri Pak komıtet basshysy mindetin atqarýshy bolyp jumys istedi", - dedi Birtanov jýrnalısterge bergen suxbatynda.
Mınıstrdiń aıtýynsha, buryn mınıstrlikte farmatsevtıkalyq jáne medıtsınalyq qyzmetti baqylaý komıteti bolǵan. Bertin kele farmatsııa komıteti bólek shyǵaryldy. "Dál osy komıtette ol tóraǵanyń orynbasary ári mindetin atqarýshy bolǵan. Ony komıtet tóraǵasy qyzmetine qoımady. Sebebi kásibı biliktilik talaptaryna saı kelmedi. Birinshiden, ol zeınet jasqa jetken. Sol sebepti "A" kategorııasyna, ıaǵnı komıtet tóraǵasy qyzmetine talasa almady", - dep atap kórsetti Eljan Amantaıuly.
"Komıtet tóraǵasy mindetin atqarýshy jáne oǵan qarasty qyzmetkerler dári-dármekpen qamtamasyz etýge qatysty barlyq máselelermen aınalysty. "SK Farmatsııanyń" kúndelikti jumysyna da aralasty. Dál osy uıymnyń dári-dármekterdi satyp alýǵa jaýapty ekeni belgili. Onyń qyzmeti tıisti normatıvtik bazamen retteledi. Ony da komıtet ázirleıdi", - dedi ol.
Aıta keteıik, Larısa Paktan bólek jalpy 10 mıllıon teńge kóleminde para alǵany úshin komıtettiń bas sarapshysy D.K.Ibraeva, Pavlodar oblysy boıynsha farmatsııa departamentiniń tóraıymy Z.Sh.Qajynova, Ońtústik Qazaqstan oblysy boıynsha farmatsııa komıtetiniń bas mamany P.T.Imamxodjaev, sondaı-aq parany bergen "Zerde" JShS atqarýshy dırektory E.M.Júzbaeva qamaýǵa alyndy.