Densaýlyq mınıstri dárigerlerdi jumys ýaqytynda Internetten kıno kórmeýge shaqyrdy

ASTANA. QazAqparat - Medıtsınalyq uıymdardaǵy Internettiń turyp qalýy qyzmetkerlerdiń kıno kórýinen bolyp otyr. Bul týraly búgin QR Parlamenti Májilisinde densaýlyq saqtaý salasyn tsıfrlandyrý taqyrybynda ótken Úkimet saǵatynda elimizdiń Densaýlyq saqtaý mınıstri Eljan Birtanov aıtty, dep habarlaıdy QazAqparat.

Shara barysynda Májilis deptýtaty Aızada Qurmanova qazirgi ýaqytta medıtsına qyzmetkerlerin olardyń oqytylmaýynan nemese Internettiń turaqty túrde turyp qalýynan derekterdi medıtsınalyq aqparattyq júıege engizý óte uzaqqa sozylatyndyǵy mazalaıtynyn atap ótti.

«Keıbir kezde bul derekter aqparattyq júıede joǵalyp qalǵan jaǵdaılar da bolǵan. Sol sebepti emdelýshilerdiń kezekteri de, narazylyǵy da týyndap otyr. Bir emdelýshiniń tekserilýine ýaqyt normatıvteri bar. Osyǵan baılanysty normatıvter qaıta qarala ma jáne aqparattyq júıelerdegi turyp qalýyna baılanysty tehnıkalyq problemalar qalaı sheshiletin bolady?», - dep surady ol mınıstrden.

«Qazirgi kúni biz paıdalanyp júrgen búkil standarttar qaǵaz túrinde jumys jasaýǵa arnalǵan. Sol úshin biz eń aldymen tolyqtaı elektrondyq formatqa kóshýimiz qajet. Aǵymdaǵy jyldan bastap Qaraǵandy oblysynyń avtomattandyrý júrgizetin kompanııasymen kelisip, hranometrajdyq zertteý ótkizip, jańa standarttardy ázirlep, talqylap, odan keıin bekitýdi josparlap otyrmyz. Bul óte mańyzdy», - dedi mınıstr.

Sonymen qatar ol medıtsınalyq mekemelerdegi Internettiń durys jumys isteýi aqparattyq tehnologııalarǵa baılanysty ekendigin basa aıtty.

«Árbir medıtsınalyq uıymnyń basshysy bul máselege jan-jaqty daıynalýy kerek. Sebebi kóp jaǵdaıda dárigerler jáne basqa qyzmetkerler Internetti tek jumysyna ǵana paıdalanbaı basqa maqsattarda, máselen ınternet qarap, kıno kórýge paıdalanady. Sondyqtan Internet toqtap qalady. Muny mendjment qarap otyrýy tıis»,- dedi Erlan Birtanov.