«Densaýlyq» memlekettik baǵdarlamasy qaıta qaralady
ASTANA. QazAqparat - «Densaýlyq» memlekettik baǵdarlamasy bir aıdyń ishinde jańartylady. Bul týraly búgin Úkimet otyrysynda 2016-2019 jyldarǵa arnalǵan atalǵan memlekettik baǵdarlamanyń ótken jylǵy qorytyndysyn shyǵarǵan QR Densaýlyq saqtaý mınıstri Eljan Birtanov aıtty, dep habarlaıdy QazAqparat.
«Jalpy memlekettik baǵdarlamanyń 35 kórsetkishiniń 30-y oryndaldy, 5-eýi oryndalǵan joq. Onyń bireýi mindetti áleýmettik medıtsınalyq saqtandyrýdy engizý merziminiń aýysýyna baılanysty boldy. Jalpy ólim, ana ólimi jáne basqa da kórsetkishter boıynsha jaqsarý baıqalyp otyr. Alaıda, josparly ındıkatorlarǵa kóptegen óńirde qol jetkizilmedi. Bul respýblıkalyq mánge áser etti», - dedi mınıstr.
Mysaly, onyń aıtýynsha, birqatar óńirde memlekettik baǵdarlama kórsetkishteri 20 paıyzdan astamǵa qol jetkizilmedi. Atyraý, Aqmola, Soltústik Qazaqstan jáne Shyǵys Qazaqstan oblystarynda 20 paıyzdan astam kórsetkish oryndalmaǵan.
«Osyǵan baılanysty aǵymdaǵy jyly mınıstrlik memlekettik baǵdarlamany sapaly oryndaýǵa baǵyttalǵan sharalardy qabyldaýy qajet. Birinshiden, Memleket basshysynyń Joldaýyn oryndaý aıasynda bir aı merzimde «Densaýlyq» memlekettik baǵdarlamasyn jańartýymyz jáne memlekettik baǵdarlamanyń óńirlik josparlaryn qaıta qaraýymyz qajet. Ekinshiden, mınıstrlik, sonymen qatar densaýlyq saqtaý salasyndaǵy jańartý jobasy boıynsha óńirlik oqytý sharalaryn ótkizý josparlanyp otyr», - dedi Eljan Birtanov.
